21 Յունուար 2020-ին, Վահան Թէքէեան Միջնակարգ Վարժարանի մանկապարտէզի եւ առաջին շրջանի դասարանները այցելեցին «Smile In a Box» բարեսիրական կազմակերպութեան անդամները, ընկերակցութեամբ՝ ՌԱԿ-ի աշխոյժ անդամ Ընկ. Արա Թերզեանի: Սոյն կազմակերպութեան նպատակն է ցնծութիւն սփռել մեր անմեղունակ փոքրիկներուն սրտերուն մէջ ու ժպիտ գծագրել անոնց գեղեցիկ դիմագիծերուն վրայ, նամանաւանդ այս օրերուն , երբ լիբանանցիները կ’ապրին ճգնաժամային օրեր: Մեր աշակերտները անհամբեր կը սպասէին այցելուներուն, որոնք առատաբաշխ ձեռքերով մտան իւրաքանչիւր դասարանէ ներս, ուրախ մթնոլորտ մը ստեղծելով եւ աշակերտին մօտ հետաքրքրութիւն յառաջացնելով, թէ ի՛նչ կրնար ըլլալ իր սեփական տուփին պարունակութիւնը:
Վարձքը կատար այս շնորհալի կազմակերպութեան բոլոր անդամներուն: Կը մաղթենք, որ Աստուած ոյժ եւ կորով պարգեւէ իրենց, որպէսզի յարատեւեն իրենց վսեմ առաքելութեան մէջ:
Վահան Թէքէեան Միջնակարգ Վարժարանի
Լրատուական Գրասենեակ
