«Ստեղծագործ Եվրոպա» ծրագրի «Մշակույթ» ենթածրագրի շրջանակում` Հայաստանը նկատելի հաջողություններ է գրանցել:
«Արմենպրես»-ի հաղորդմամբ` դեռ նախորդ տարվանից Եվրոպական միության ծրագրի շրջանակում Փոքր թատրոնը մասնակցում է ImPart ներառական թատերական ծրագրին`եվրոպական գործընկերների հետ համատեղ ներկայացումներ բեմադրելով և դրանք միջազգային բեմերում ներկայացնելով, Հայաստանից վեց արվեստագետ էլ i-Portunus ճամփորդական դրամաշնորհով ստեղծարար գործունեություն է իրականացրել Եվրոպայի մի շարք երկրներում` ստեղծելով համագործակցության նոր հնարավորություններ:
Այս մասին դեկտեմբերի 12-ին լրագրողների հետ զրույցում ասաց «Ստեղծագործ Եվրոպա» հայաստանյան գրասենյակի ղեկավար Սեդա Գրիգորյանը:
«Փոքր թատրոնը Վահան Բադալյանի ղեկավարությամբ բեմադրություններով քարոզում է ներառականությունը` թատերախմբում ներառելով հաշմանդամություն ունեցող դերասանների, հրավիրելով հաշմանդամություն ունեցող հանդիսատեսի: Այս տարի ծրագրին մասնակցում է նաև Արէ կատարողական արվեստների փառատոնը, որը հայ արվեստագետներին հնարավորություն է տալիս մասնակցել միջազգային աշխատարանների և վերապատրաստման ծրագրերի»,-ասաց Գրիգորյանն ու հավելեց, որ 2019-ի ընթացքում «Ստեղծագործ Եվրոպա» ծրագրի շնորհիվ հայաստանյան մշակութային կազմակերպությունները համագործակցել են տասից ավելի եվրոպական երկրների գործընկերների հետ:
«Սա լավ հնարավորություն է մշակութային կամուրջներ կառուցելու և դրանք պահպանելու համար»,-շեշտեց նա:
Հայաստանը «Ստեղծագործ Եվրոպա» պետական ծրագրին պաշտոնապես միացել է 2018 թվականի հուլիսից: «Ստեղծագործ Եվրոպա»-ն Եվրոպական միության մշակույթի աջակցության հիմնական ծրագիրն է, որն իրականացվում է յոթամյա փուլերով:
Մեր երկիրը ծրագրի «Մշակույթ» և «Մեդիա» ենթածրագրերից մասնակցում է միայն «Մշակույթ»-ին, որը հնարավորություններ է բացում մշակույթի բոլոր ճյուղերի համար: Բացառություն են աուդիովիզուալ ոլորտը, կինոն և հեռուստատեսությունը:
