Երգի Մը Պատմութիւնը -27-
ԱՆԱՀԻՏ ԿՕՇԿԱՐԵԱՆ
«Զարթօնք»ի Աշխատակից
Երբ կը հնչէ Անջէյնտ Մելոտին, ան կարծես կը ծորի ժամանակի մէջէն՝ կանգնեցնելով մոլորակի շարժումը 3 վայրկեան եւ 35 երկվայրկեանով, շրջապատը վերածելով մեծ, հիասքանչ քնքուշ ու մեղմ սիրավէպի մը։ Ան իրմով կը պարուրէ ամէն-ինչ, բայց աւելին՝ ան ունակ է ամենաչոր սիրտերն ու ամենաանտարբեր հոգիները ստիպելու թրթռալ, ։ Այս երգը սիրոյ մարմնացում է երաժշտական նօթերու միջոցաւ։
Ան գրուած է 1955ի «Շղթաներէ Ազատուածը» (“Unchained”) ֆիլմին համար։ Հեղինակներն են Հէյ Զարեթն ու Ալեքս Նորթը։ Ֆիլմը իրական դէպքերու հիման վրայ գրուած պատմութիւն էր բանտարկեալի մը մասին, որ դժուարին ընտրութեան առջեւ էր։ Ան պէտք է որոշեր իր յետագայ ճակատագիրը․ փախուստի գնով ազատութիւն՝ վտանգուելով ցմահ ազատազրկման, թէ՝ այնուամենայնիւ ողջ պատիժի կրումը՝ խեղդամահ անող կարօտի զգացումով, բայց ուշ կամ կանուխ ազատութեան մէջ ըլլալու հեռանկարով։
Երգի հեղինակ Հէյ Զարեթը երգը գրելու միջոցին փորձած է հնարաւոր չափով հոն կեդրոնացնել ամէն ինչ սիրելիի մասին ու կարօտի և թախիծի շուրջ։ Ան ոչ մէկ կերպ չառնչուիր բանտարկեալի ըմբոստութեան պոռթկման հետ, այլ՝ ամբողջովին կ՛արտացոլացնէ սիրեցեալին կարօտած տղամարդու հոգեկան տանջանքները։
Ֆիլմի լոյս ընծայումէն յետոյ նոյն թուականին՝ 1955ին երգը առաջադրուեցաւ Օսկար մրցանակաբաշխութեան, սակայն մրցանակը զիջեցաւ մէկ այլ երգի։ Հակառակ այս հանգամանքին, երգը մեծ յաջողութիւններ ունեցաւ․ անմիջապէս սիրուեցաւ հանդիսատեսին կողմէն և գրաւեց բազմաթիւ աստղային երաժիշտներու ուշադրութիւնը, որոնք վերաերգեցին զայն բազմաթիւ անգամներ։
Երգի առաջին տարբերակի կատարողն եղաւ Թոտ Տանքընը, որ իր հիանալի կատարումով երգը աւելի յուզական դարձուց։ Սակայն երգի անզուգական ու չգերազանցուած տարբերակի կատարողն եղաւ Էլվիս Փրեսլին, 1976 թուականին։ Եւ, իրականին մէջ, երգի մասին խօսելու պահուն բոլորը կը կարծեն , որ երգի առաջին ու հեղինակային կատարող Էլվիսը եղած է։ Անոր կատարումով երգը անմահացաւ։
Երգի երկրորդ ծնունդը եղաւ 1990 թուականին, երբ երգը Ռայթչես Պրատըրս խումբի կատարմամբ հնչեց «Ուրուականը» (The Ghost) ֆիլմին մէջ՝ Տեմի Մուրի և Փատրիք Սուէյզիի մասնակցութեամբ։ Այն կրկին յայտնուեցաւ բրիտանական հիթ-շքերթներու առաջատար դիրքերուն վրայ։
Պարբերաբար կատարելով այս երգը, կատարողները կ՛ապահովեն երգի «ճանաչելիութեան և յայտնիութեան» բարձր չափանիշը։ Բացի Էլվիս Փրեսլիյէն, յայտնի կատարողներուն մէջ կան Կարեթ Կեյթսը, Եութու խումբը, Ռոպսըն Էնտ Ժերոմ զոյգը, Սմաշինկ Փամփկինս խումբը, և ուրիշներ։
Հետաքրքրական է հետևեալը․ երգը յայտնուած է Կինեսի Մրցանիշներու Գիրքին մէջ՝ իր բազմաթիւ վերաերգուած տարբերակներու շնորհիւ։ Յայտնի են 500է աւելի տարբերակներ, աւելի քան 100 լեզուներով։
Եւ ինչպէս միշտ՝ երգը անմահ է, քանի դեռ զայն լսող կայ։ «Անջէյտդ Մելոտիի» պարագային՝ կարելի է ըսել, որ ան յարատև է։ Դժուար է պատկերացնել ռոմանթիք երեկոյ կամ արարողութիւն առանց այս երգի մասնակցութեան։ Ան սիրավէպերու անբաժան մասը կը կազմէ և արդարև արժանի է կոչուելու սիրոյ հիմներու առաջատար։
«Միայնակ գետերը կը հոսին դէպի ծովը՝
Դէպի ծովի՝ լայն բացուած գիրկը․․․․»
