Կիրակի, 14. 04. 2024

spot_img

Նիւ Եորք, Նիւ Եորք – Ֆրենք Սինադրա (New York , New York – Frank Sinatra) (լուսանկարներ, տեսերիզ)

Երգի Մը Պամտութիւնը -26-

ԱՆԱՀԻՏ ԿՕՇԿԱՐԵԱՆ

«Զարթօնք»ի Աշխատակից                                                                                                           

«Նիւ Եորք, Նիւ Եորք» երգը  բազմակի անգամ վերաերգուած երգ է։ Անիկա չհինցող երգերու շարքին կը պատանի եւ երկար ժամանակէ ի վեր դարձած է Նիւ Եորք  քաղաքի ոչ պաշտօնական քայլերգը։ Երգը յայտնի է  Ֆրենք Սինադրայի կատարմամբ, բայց զայն առաջին անգամ հանրութեան դատին ներկայացուց Լայզա Մինելին: Երգը գրուեցաւ Մարթին Սքորսեզէի   «Նիւ Եորք, Նիւ Եորք » ֆիլմի  համար: Ջոն Քետերին եւ  Ֆրետ Էպպին՝ երգի հեղինակներուն պատուիրեցին գրել երգ ֆիլմի համար :

            Հեղինակները կը պատմեն, որ երգը գրուած է  բարկացած ժամանակ, երբ ցասումը հասած է իր գագաթնակէտին»: Հարցը այն  է, որ ֆիլմի բեմադրիչ Սքորսեզէն հեղինակներուն կը պատուիրէ գրել 5 երգ, ինչպէս նաեւ Ֆիլմի գլխաւոր թեման: Երբ հեղինակները երգերը կ’աւարտեն,  զանոնք ցոյց տալու համար կու գան բեմադրիչի եւ գլխաւոր դերակատարներու հետ հանդիպման։ Դերասաններ Լայզա Մինելին եւ Ռոպերթ Տենիրոն չեն հաւանիր երգը՝ զայն անուանելով «չոր»: Տենիրոն նոյնիսկ հեղինակներուն կը խնդրէ վերանայիլ երգը եւ դարձեալ գրել զայն: Անոր կարծիքով երգը պէտք է ըլլայ աւելի «հզօր»: Հեղինակները կը վիրաւորուին ինքնահաւան դերասանի մեծամիտ դիտողութենէն: Զիրենք կը վրդովեցնէ այն փաստը, որ երիտասարդ դերասանները իրենց գրել կը սորվեցնեն: Անոնք բարկութեամբ լեցուած կը փոխեն երգը  գրեթէ ամբողջապէս: Աւելի ուշ Էպպ կը խոստովանի, որ Տենիրոն իրաւացի էր, եւ եթէ ան չստիպեր երգի մէջ փոփոխութիւններ ընել, արդիւնքը այդքան յաջող չէր ըլլար:

            Երգը կատարեց Լայզան: Ֆիլմը յաջողութիւններ չունեցաւ, բայց  Լայզան կը շարունակէր զայն երգել իր համերգներու ժամանակ:

            Երգը  իր յայտնիութիւնն ու երկրորդ շունչը ստացաւ երբ զայն վերաերգեց Ֆրենք Սինադրան, ով յայտնի էր որպէս  60-ականներու երգերու վերաերգող եւ վերակենդանացնող երգիչ: Սինադրան, սակայն, երգի  մէջ փոխեց մի քանի տող: Էպպ կը խոստովանի, որ թէեւ փոխուած բառերուն հեղինակն ինքը չէ, բայց ան շնորհակալ է Ֆրենքին, որ ինք երգը դարձուց այդքան հանրաճանաչ:

            Երգի մասին մի քանի հետաքրքրական փաստեր կան.

«Նիւ Եորք  Եանքիզ» պէյսպոլային ակումբի երզրափակիչ խաղերուն ժամանակ միշտ կը հնչէր  «Նիւ Եորք, Նիւ Եորք» երգը: Եթէ  ակումբը կը յաղթէր՝ կը հնչէր Սինադրայի կատարմաբ, եթէ պարտուէր՝ Լայզա Մինելիի կատարմամբ: Այս հանգամանքը վերջ ի վերջոյ յանգեցուց անոր, որ Մինելիի համակիրները սկսան վրդովիլ եւ բազմաթիւ բողոքներու եւ դժգոհութիւններու արդիւնքով այս աւանդոյթը դադարեցաւ:

1990 թուականին, Սինադրան իր 75 ամեակի առիթով կազմակերպուած համերգի ժամանակ այս երգ կատարեց  Լայզայի հետ միասին, անակնկալ ընելով համակիրներուն:

Ամէն տարի Նոր Տարիին, ժամը 00:00-ին «Նիւ Եորք, Նիւ Եորք »-ը  կը հնչէ Թայմ-Սքուերի մէջ: Անիկա ոչ պաշտօնապէս դարձած է Նիւ Եորքի Նոր Տարուայ քայլերգը, ազդարարելով նոր  տարուայ սկիզբը:

Երգը կը հնչէ նաեւ համաշխարհային յայտնիութիւն ստացած, մեծերու եւ փոքրերու սիրելի «Մատակասքար» մանկական շարժապատկերի մէջ:    

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին