Երեքշաբթի, 18. 06. 2024

spot_img

Մայր Աթոռ Սուրբ Էջմիածնում հիւրընկալուեցին Լոս Անճելըսի ՀԲԸՄ Մանուկեան-Տեմիրճեան դպրոցի 10-րդ դասարանի աշակերտները

ՆՈՐ ՕՐ, ԼՈՍ ԱՆՃԵԼԸՍ.- Յունիսի 14-ին Մայր Աթոռ Սուրբ Էջմիածնի «Գարեգին Ա.» կրթական կենտրոնում Մայր Աթոռի Արտաքին յարաբերութիւնների բաժնի պատասխանատու Գերաշնորհ Տ. Նաթան արքեպիսկոպոս Յովհաննիսեանը եւ Քրիստոնէական դաստիարակութեան կենտրոնի տնօրէն Հոգեշնորհ Տ. Զաքարիա ծայրագոյն վարդապետ Բաղումեանն ընդունեցին Լոս Անճելըսի ՀԲԸՄ Մանուկեան-Տեմիրճեան դպրոցի 10-րդ դասարանի աշակերտներին՝ ուղեկցութեամբ դպրոցի տնօրէն Արփի Աւանէսեանի եւ մի քանի ուսուցիչների:

Հանդիպումը սկսուեց Տէրունական աղօթքով, որից յետոյ Տ. Նաթան արքեպիսկոպոս Յովհաննիսեանը ողջունեց ներկաներին՝ ընդգծելով որպէս ուխտաւոր նրանցից իւրաքանչիւրի դերը Էջմիածնի պատմութեան մէջ՝ հիմնադրումից մինչեւ այսօր:

Սրբազան Հայրը կարեւորեց նման այցելութիւնները` բացատրելով, որ դրանք մշտապէս կապում են հայ երիտասարդին հայրենիքի հետ եւ դրանց շնորհիւ նրանք դառնում են քրիստոնէութեան պատմութեան ամբողջ ընթացքի անբաժան մասը:

«Այսօր դուք միախառնւում էք հայ ազգի հետ, որից յետոյ բաժանուելն այլեւս անհնար է: Սա ազգային արմատներին եւ ինքնութեանը վերադառնալու կարեւորագոյն քայլերից է, որը առաջնային նշանակութիւն ունի համաշխարհայնացման այս դարաշրջանում: Առանց մշակոյթի, աւանդոյթների եւ ինքնութեան մարդն անհասկանալի ինչ-որ մէկն է, այդ իսկ պատճառով շատ կարեւոր է կարողանալ ճանաչել եւ պահպանել դրանք: Սա եւս մէկ առիթ է, որ ամրանաք ձեր հայ լինելու մէջ»,– ընդգծեց Նաթան արքեպիսկոպոսը:

Աւարտելով խօսքը` Սրբազանը երիտասարդներին պատգամեց այս ուխտը հաւատարմութեան եւ սիրոյ ուխտ դարձնել, քանի որ Սուրբ Էջմիածին եկող ուխտաւորը նորոգում է իր հայ մնալու եւ ազգայինին հաւատարիմ մնալու ուխտը: Առանց հաւատարմութեան սէր չկայ եւ առանց սիրոյ՝ հաւատարմութիւն, հաստատեց Նաթան Սրբազանը` յաւելելով, որ այս երկուսն են, որ հիմք են հանդիսանում ազգային ինքնութեան պահպանման գործում:

Ուխտաւորներին ողջունեց նաեւ Հոգեշնորհ Տ. Զաքարիա ծայրագոյն վարդապետը` կարեւորելով հայրենիքի զգացողութիւն ունենալը իւրաքանչիւր հայի մէջ: Նա մաղթեց, որ այս ուխտագնացութեամբ աշակերտները զգան հայրենի հողի զօրութիւնը եւ այդ զօրութիւնն ու սէրը տանեն այլ երկրներում բնակուող միւս հայրենակիցներին:

Հանդիպմանը դպրոցի հայոց լեզուի եւ պատմութեան ուսուցիչ Բարեշնորհ Յովհաննէս սարկաւագ Գումրուեանը, նշեց, որ աշակերտների մեծամասնութիւնը առաջին անգամ են Հայաստանում եւ դպրոցում գեղեցիկ աւանդոյթ է ձեւաւորուել, ըստ որի 10-րդ դասարանի աշակերտները ուխտաւորաբար այցելում են Հայաստան եւ անպայմանօրէն Սուրբ Էջմիածին՝ ծանօթանալու պատմական, ազգային, հոգեւոր եւ մշակութային արժէքներին:

Մայր Աթոռ այցելութեան ընթացքում ուխտաւորները ներկայ գտնուեցին նաեւ ՀՀ ազգային հերոս Ալեք Մանուկեանի եւ տիկին Մարի Մանուկեանի շիրիմի առջեւ այս առիթով մատուցուած հոգեհանգստեան արարողութեանը։

 

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին