«ԶԱՐԹՕՆՔ», ՊԷՅՐՈՒԹ –«Ֆիուչըր» շարժման խորհրդարանական խմբակցութիւնը, Երեքշաբթի օր, արտայայտած էր իր աջակցութիւնը Կեդրոնական դրամատան կառավարիչ Ռիատ Սալամէին՝ ընդգծելով, որ գործադուլները չեն կրնար կարգաւորել երկրի վիճակը։
Խմբակցութիւնը, իր հերթական հանդիպումէն ետք հրապարակած յայտարարութեամբ մը նշեց, որ Սալամէ եւ դրամատնային ոլորտը թիրախ կը հանդիսանային «թաքնուած պայքարի մը, որ խեղաթիւրեց փաստերը եւ հասարակութեան կարծիքը դէմ հանեց դրամական ու դրամատնային քաղաքականութեան»։ Հրապարակման մէջ, սակայն, չէր մատնանշուեր, թէ որուն կը վերաբերէր ատիկա։
Մեկնաբանութիւնները սկսան այն պահուն, երբ «Պանք տիւ Լիպան»-ի աշխատակիցներու սենտիքան նոյն օրը յայտարարեց, որ գործադուլը կը դադրեցուի մինչեւ Ուրբաթ:
Նշենք, որ աշխատակիցները գործադուլի դիմած են՝ բողոքելով 2019-ի Պետական պիւտճէի նախագիծին մէջ աշխատավարձի կրճատման դէմ, թէեւ դադրեցուցին՝ ստանալով Սալամէի հաւաստիացումները, թէ իրենց իրաւունքները պիտի չկրճատուին:
Կառավարութիւնը պիւտճէի նախագիծը կը քննարկէր նախորդ շաբթուան ընթացքին իրականացուցած իր հերթական նստաշրջաներով, որպէսզի հաստատէ զայն եւ խորհրդարան ուղարկէ վերջնական հաստատման համար:
Խմբակցութիւնը նաեւ նշած էր, որ փողոցները իրենց հսկողութեան տակ առնելով, ճանապարհները փակելով եւ պետական կառոյցները կաթուածահար ընելով կարելի չէ լուծել տնտեսական խնդիրները: