«ԶԱՐԹՕՆՔ», ՊԷՅՐՈՒԹ – Հայաստանի Հանրապետութեան Ազգային ժողովի արտաքին յարաբերութիւններու մշտական յանձնաժողովի նախագահ Ռուբէն Ռուբինեան, փոխնախագահ Յովհաննէս Իգիթեան, յանձնաժողովի անդամ Արման Բաբաջանեան, ՀՀ ԱԺ Հայաստան-Սպանիա բարեկամական խումբի ղեկավար Սօս Աւետիսեան Մայիս 7-ին հանդիպած են Սպանիոյ արտաքին գործերու նախարարութեան պետքարտուղար Ֆերնանտօ Վալենսուելայի գլխաւորած պատուիրակութեան հետ:
Ինչպէս «Արմէնփրես»-ին յայտնած են ՀՀ Ազգային ժողովի լրատուութեան եւ հանրութեան հետ կապերու վարչութենէն, ողջունելով հիւրերը` յանձնաժողովի նախագահը խօսած է հայ-Սպանական բարի դրացիական յարաբերութիւններու մասին, կարեւորած երկու պետութիւններու միջխորհրդարանական կապերու զարգացումը: Կողմերը անդրադարձած են միջազգային խորհրդարանական կազմակերպութիւններու փոխադարձ համագործակցութեան:
Խօսելով ԵՄ անդամ երկիրներու կողմէ Հայաստան-ԵՄ Համապարփակ եւ ընդլայնուած գործընկերութեան համաձայնագրի վաւերացման գործընթացի մասին` Ֆերնանտօ Վալենսուելան վստահեցուցած է, որ Սպանիոյ կողմէ փաստաթուղթը եւս շուտով կը վաւերացուի:
Անդրադառնալով Լեռնային Ղարաբաղի հիմնախնդրի խաղաղ կարգաւորման` յանձնաժողովի նախագահը ներկայացուցած է հայկական կողմի դիրքորոշումները, խօսած Արցախի` իբրեւ բանակցային կողմ ներգրաւուելու անհրաժեշտութեան մասին:
Ռուբէն Ռուբինեան անդրադարձած է նաեւ Հայոց ցեղասպանութեան միջազգային ճանաչման կարեւորութեան` ընդգծելով, որ Սպանիան դեռ չէ ճանչցած զայն:
Իբրեւ ԵՄ անդամ երկրի ներկայացուցիչ` Սպանիոյ ԱԳՆ պետքարտուղարը արտայայտուած է Հայաստանի հետ վիզային ռեժիմի ազատականացման հարցի շուրջ երկխօսութեան գործընթացի մեկնարկի օգտին:
Հայ խորհրդարանականները խօսած են շարք մը ոլորտներու մէջ հայ-սպանական համագործակցութեան հնարաւորութիւններու մասին:
