«ԶԱՐԹՕՆՔ», ՊԷՅՐՈՒԹ –2019 թուականի պետական պիւտճէի նախագիծին վերաբերեալ մանրամասն քննարկումները կը սկսին այս շաբաթ եւ կ’աւարտին կառավարութեան կողմէ պիւտճէի հաստատումով: Այս մասին, Երեքշաբթի, յայտարարեց Ելեւմտական նախարար Ալի Հասան Խալիլ:
Կառավարութեան առաջին նիստին աւարտէն ետք՝ լրագրողներու հետ զրոյցի մը ընթացքին՝ Խալիլ ըսաւ, որ Երեքշաբթի օրուան բանակցութիւնները կեդրոնացած էին պիւտճէի ընդհանուր նախագիծին վրայ: Անոր տեղեկութիւններով՝ մանրամասն քննարկումները կը սկսին այսօր՝ Չորեքշաբթի, «Կրէնտ Սերայլ»-ի մէջ կայացած հանդիպման մը ժամանակ եւ կը շարունակուին ամբողջ շաբթուան ընթացքին:
«Ես լաւատես եմ, որ պիւտճէն արագ պիտի հաստատուի»,- ըսաւ Խալիլ:
Նիստին սկիզբը, նախագահ Միշէլ Աուն յայտարարեց, որ խորհրդարանը 2019 թուականի պետական պիւտճէի նախագիծը պէտք է հաստատէ մինչեւ Մայիսի վերջը:
Խալիլ, վարչապետ Սաատ Հարիրիին ներկայացուցած էր վերանայուած պիւտճէին նախագիծը, որ կը կրճատէ բոլոր նախարարութիւններուն ծախսերը եւ կը տրամադրէ ֆինանսաւորման այլ կրճատումներ` երկրի պակասուրդը խաթարելու համար: Անցեալ տարուան պակասուրդը գնահատուած է 6,7 միլիառ տոլար, կամ ՀՆԱ-ի (համախառն ներքին արդիւնք) 11 տոկոսը, թէեւ վերջնական ցուցանիշները չեն հրապարակուած:
Ան ըսած էր, որ եթէ պիւտճէի համար առաջարկուած խնայողութիւններու միջոցները յաջողութեամբ ապացուցեն, 2019-ին պակասուրդի եւ ՀՆԱ յարաբերակցութիւնը կրնայ կրճատուիլ 2,5 տոկոսով:
2018-ի ՍԵՏՐ խորհրդաժողովին ընթացքին՝ Լիբանանի հիմնական խոստումներէն մէկը եղած է հինգ տարիներու ընթացքին, տարեկան կտրուածքով, պակասուրդ-ՀՆԱ յարաբերակցութիւնը նուազեցնել 1 տոկոսով: Սակայն առաջարկուող տարբերակները ցոյց տուած են, որ անոնք հակասական են:
Երեքշաբթի օր, «Ալ Ժումհուրիա» թերթը հրապարակած էր Խորհրդարանի նախագահ Նէպիհ Պըրրիի այն պարզաբանումը, թէ պիւտճէի քննարկումները կարգաւորուած են:
«Պիւտճէի նախագիծը ո՛չ «Քուրա՛ն»ն է, ոչ ալ Աստուածաշունչը: Եթէ անիկա հաւանութեան արժանանայ՝ լաւ է … եւ եթէ պահանջուին աւելի լաւ փոփոխութիւններ, ուրեմն թող ըլլան այդպէս»,- ըսած է Պըրրի:
