Հինգշաբթի, 25. 07. 2024

spot_img

Յետ Մահու Մեծարանք. Լիբանանի Կեդրոնական Դրամատան Երբեմնի Փոխկառավարիչ Ժոզէֆ Ուղուրլեանին (լուսանկարներ)

Ուրբաթ, 29 Մարտ 2019-ի երեկոյեան, ՀԲԸՄ-ի Տեմիրճեան կեդրոնին մէջ տեղի ունեցաւ բացառիկ երեկոյթ մը՝ նուիրուած Լիբանանի Կեդրոնական դրամատան երբեմնի փոխ-կառավարիչ Ժոզէֆ Ուղուրլեանին, որ մօտիկ անցեալին մեծ յաջողութեամբ զբաղեցուցած էր Լիբանանի Կեդրոնական դրամատան փոխկառավարիչի պաշտօնը՝ 1964 թուականէն մինչեւ 1983: Հանգուցեալ Ուղուրլեան եղած էր նաեւ տնտեսական մարզին մէջ խորհրդատուն Լիբանանի նախագահ Պշարա Խուրիին, ինչպէս նաեւ ընդհանուր տնօրէնի օգնական Լիբանանի ելեւմուտի նախարարին:

Հայազգի արժէքաւոր մարդուն համար կատարուած սոյն  յիշատակի եւ յարգանքի երեկոն պէտք է արձանագրել, որ բարոյական պարտաւորութիւն մըն էր եւ արժանի մեծարանք՝ կազմակերպուած Հայկական բարեգործական ընդհանուր միութեան շրջանակային յանձնաժողովին կողմէ, Լիբանանի մէջ Հայաստանի Հանրապետութեան դեսպանատան հետ գործակցաբար, որ պիտի յիշուի երկար եւ որուն տպաւորութիւնը պիտի մնայ անջնջելի:  

Արդարեւ, Լիբանանի մէջ այս օրերս տեղի ունեցող եւ պետականօրէն նշուող «Ֆրանքոֆոնեան ամիս» շրջագիծին մէջ անկասկած որ բացառիկ միջոցառում մըն էր կատարուածը, ուր զգալիօրէն ներկայ էր նաեւ Հայաստանի Հանրապետութեան շունչը:

Եզակի երեկոն յատկանշական էր այն իմաստով, որ երեկոյթին ներկայ էին մեծ թիւով լիբանանցի եւ լիբանանահայ երեւելի անձինք եւ հրաւիրեալներ, որոնց շարքին՝ նախկին եւ ներկայ նախարարներ եւ երեսփոխաններ՝ Սելիմ Ժրեյսաթի, Ռիշար Գույումճեան, Արթիւր Նազարեան, Լեյլա Սըլըհ-Համատէ, Յակոբ Գասարճեան, Հայաստանի Հանրապետութեան դեսպան Վահագն Աթաբեկեան, ՀԲԸՄ-ի նախագահ մեթր Պերճ Սեդրակեան, ՀԲԸՄ-ի կեդրոնական վարչական ժողովի անդամ Ժոզէֆ Ուղուրլեան (կրտսեր), պետական դէմքեր, ազգային բարերարներ, ինչպէս նաեւ մամուլի եւ տեղեկատուական միջոցներու ներկայացուցիչներ:

Փառաշուք հանդիսութեան ներկայ էին նաեւ ՀԲԸՄ-ի Լիբանանի շրջանակային յանձնաժողովի ատենապետ Ժերար Թիւֆենքճեան եւ շրջանակայինի անդամներ, ՀԵԸ-ի  կեդրոնական վարչութեան ատենապետն ու վարչական անդամներ, միութենականներ եւ գնահատելի բազմութիւն մը:

Յարգանքի երեկոն սկսաւ ՀԲԸՄ-ի շրջանակային յանձնաժողովի անդամ տիկին Միրէյ Խանամիրեանի բացման խօսքով (ֆրանսերէն), ուր ան կարեւորեց առնուած յատկանշական ու եզակի քայլը, որ կը զուգադիպէր Լիբանանի մէջ տեղի ունեցող «Ֆրանքոֆոնեան ամիս»-ին  եւ որ նուիրուած էր արժանաւոր հայու մը՝ հանգուցեալ Ժոզէֆ Ուղուրլեանին, դասելով կատարուածը որպէս յետ մահու արժանի մեծարանք:

Տիկին Խանամիրեանի բացման խօսքէն ետք հանդէս եկաւ Հայաստանի Հանրապետութեան Լիբանանի մօտ դեսպան պրն. Վահագն Աթաբեկեան: Պարոն Աթաբեկեան կարեւորեց ֆրանսախօս երկիրներն ու ժողովուրդները իրար կապող «Ֆրանքոֆոնեան շարժումը»՝ մատնանշելով շարժումին ունեցած եւ ունենալիք դերը ներկայիս եւ ապագային, միաժամանակ անդրադառնալով ՀԲԸՄ-ի հանրօգուտ ու ազգօգուտ դերակատարութեան, որ կը համախմբէ, այս պարագային, լիբանանեան երկնակամարի տակ գործող միաւորները, բարձր գնահատելով տիրող գործակցութիւնը:

Պարոն Աթաբեկեանի սրտամօտ արտայայտութիւններէն ետք, որպէս հանդիսավար հանդէս եկաւ լիբանանեան հանրութեան մօտէն ծանօթ լրագրող ու հեռատեսիլի խօսնակ Ժորժ Ղանեմ, որ իր կարգին ողջունելէ ետք ներկաները, հերթականօրէն հրաւիրեց հանդիսութեան մասնակիցները՝ լիբանանցի հանրածանօթ քաղաքագէտներն ու տնտեսագէտները, որոնք աշխատանքի բերումով մօտէն ճանչցած էին հայազգի կառավարիչ Ժոզէֆ Ուղուրլեանը եւ  գործակցած անոր հետ կամ ունեցած աշխատանքային լայն փորձ:

Առաջին հերթին խօսք առաւ Ժոզէֆ Ուղուրլեանի որդին՝ Ժան Միշէլ Ուղուրլեանը: Ժան Միշէլ գրող է, հոգեբոյժ ու հոգեբան եւ հանրածանօթ դէմք է թէ՛ Ֆրանսայի եւ թէ՛ Միացեալ Նահանգներու մէջ: Ժան Միշէլ թէ՛ ուրախութեամբ եւ թէ՛ յուզումով խօսեցաւ իր հօր՝ Լիբանանի Կեդրոնական դրամատունը աշխատած ժամանակաշրջանին մասին եւ տուաւ լայն բացատրութիւններ՝ ընդհանրապէս անդրադառնալով աշխատանքի նկատմամբ անոր ունեցած խստապահանջութեան, բծախնդրութեան եւ Լիբանանի հանդէպ ունեցած սիրոյն ու յարգանքին:

Ապա խօսք առաւ միջազգային առեւտրական մարզի պետական մասնագէտ դոկտոր  Հուսէյն Քանաան, որ միաժամանակ իրաւաբանական պետական սահմանադրական մասնագէտ է եւ հանդիսացած է առաջին փոխնախագահը Լիբանանի Կեդրոնական դրամատան: Ան դրուատեց Ուղուրլեանի գործուն դերը աշխատած ու պաշտօնավարած ժամանակաշրջանին՝ տալով մեծ վարկ Լիբանանի տնտեսութեան, գովելով անոր արի կեցուածքը:

Խօսք առաւ նաեւ տնտեսագէտ եւ հանրային մարզին մէջ մասնագէտ եւ իրաւաբան դոկտոր Ղասսան Այյաշ, որ եղած է նաեւ փոխնախագահը Կեդրոնական դրամատան: Ան գնահատանքով խօսեցաւ արժանաւոր հայուն ունեցած փորձառութեան, գիտելիքին եւ անոր բերած նպաստին մասին, որպէսզի լիբանանեան տնտեսութիւնն ու լիբանանեան դրամը մնայ կանգուն ու զօրաւոր:

Շարունակուող արտայայտութիւններու շարքին խօսք առաւ նաեւ տիար Ռոպեր Սըրսոք, որ անդամ է Լիբանանի Պանք Պէյրութի վարչական խորհուրդին եւ եղած է Ժոզէֆ Ուղուրլեանի ընտանիքին մօտ անդամը:     

Խօսք առնողներու շարքին էր Ֆիտա Ալիէ, որ վեր հանեց Ուղուրլեանի օգտաշատ դերը եւ կատարած հայրենանուէր աշխատանքը՝ բարձր դրուատելով լիբանանեան հայրենիքին հանդէպ անոր ունեցած անշահախնդիր կեցուածքը:

Վերջին խօսք առնողն էր Ուղուրլեանի փեսան՝ Ռաժա Մաքարրեմը, որ հիմնադիրն է եւ նախագահը «Ռամքօ» յանձնակատարական ընկերութեան: Ան մասնաւորաբար խօսեցաւ Ուղուրլեանի հաւատարիմ ծառայութեան եւ նուիրումին մասին՝ մէջբերելով դրուագներ անոր կեանքէն:

Ապա հանդիսավար Ժորժ Ղանեմ տպաւորիչ ուսումնասիրութեամբ մը գնահատեց կառավարիչ Ժոզէֆ Ուղուրլեանի՝ Լիբանանի տնտեսական կեանքին մէջ ունեցած յոյժ կարեւոր դերը եւ նշեց մանրամասնութիւններ՝ կապուած Կեդրոնական դրամատան ժամանակաւոր նախագահ եւ առաջին փոխնախագահի առած խիզախ ու յանդուգն քայլերուն, լոյսի բերելով հանրօգուտ ծառայութեան մարզին մէջ անոր ունեցած ուղիղ եւ անկեղծ քայլերուն ճշմարտութիւնը:

Միջոցառումի աւարտին, խօսք առաւ ՀԲԸՄ-ի նախագահ մեթր Պերճ Սեդրակեան: Ան գնահատեց կատարուած աշխատանքը, միջոցառումը եւ յայտնեց իր ուրախութիւնը լիբանանեան, հայաստանեան եւ Հայկական բարեգործական ընդհանուր միութեան գործակցութեամբ տեղի ունեցած բացառիկ կարգադրութեան եւ յաջող երեկոյին համար, որ ի մի բերած էր լիբանանեան եւ հայկական հասարակութիւնը:

Իսկ այս առթիւ հրատարակուած փոքրիկ գրքոյկին մէջ ուշագրաւ էր ՀԲԸՄ-ի նախագահին մատնանշումը Ուղուրլեանի ունեցած բացառիկ դերին ու լիբանանեան հայրենիքին բերած նպաստին: Ան գրած էր. «Կը խորհիմ, որ անոր յիշատակին յարգումը այս գիշեր կարեւոր էր գալիք սերունդներուն համար: Ուղուրլեանի նման բացառիկ հայու եւ իր անմիջական ընկերներուն մասնակցութեամբ տարիներ շարունակ կատարած առաքելութիւնն ու առաջնորդութիւնը մեծ պատիւ եւ հպարտութիւն են բոլոր հայերուս համար, որովհետեւ Ուղուրլեանը հանդիսացաւ իրա՛ւ խորհրդանիշ նուիրումի ու բարեգործ աշխատանքի՝ լիբանանեան հայրենիքին համար»:  

Երեկոն վերջ գտաւ հիւրասիրութեամբ:

«ԽՕՍՆԱԿ» ԼՐԱՏՈՒ

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին