Հինգշաբթի, 25. 07. 2024

spot_img

ՀԲԸՄ-ի Համախմբումի Աւանդական Միջինքը (լուսանկարներ)

ՇՈՂԻԿ ՊԱՂՏԱՍԱՐԵԱՆ

Հայկական բարեգործական ընդհանուր միութեան Լիբանանի Տիկնանց համախմբումը, հաւատարիմ մնալով իր առաքելութեան, ինչպէս ամէն տարի այս տարի եւս կազմակերպեց աւանդական միջինքի ձեռնարկը Չորեքշաբթի, 27 Մարտ 2019-ին Անթիլիասի Le Myth ճաշարանէն ներս: Միջոցառումին ներկայ էին ՀԲԸՄ-ի ղեկավար մարմիններու իգական սեռի ազնիւ ներկայացուցիչներ, հայկական դեսպանատան անձնակազմի ազնուափայլ տիկիններ, հայ երեսփոխաններու տիկիններ, բարեկամուհիներ, անդամուհիներ եւ համակիրներ:

Ժամանող հիւրերը մուտքին կ’արժանանային ջերմ ընդունելութեան եւ կ’առաջնորդուէին վայելելու հայ նկարիչներու վրձինով գունաւորուած եւ իմաստաւորուած կտաւներու ցուցադրութեան սրահը՝ մեղմ երաժշտութեան եւ յատուկ հիւրասիրութեան ընկերակցութեամբ:

Արդէն հրաւիրեալներ գրաւած էին իրենց տեղերը ճոխ եւ համադամ ճաշերով զարդարուած սեղաններու շուրջ, եւ զգալիօրէն կը տիրէր բարձր տրամադրութիւն: Լիբանանեան, հայկական եւ ՀԲԸՄ-ի քայլերգերու ունկնդրութենէ ետք բարի գալուստի ջերմ խօսքերով հանդէս եկաւ շնորհալի վարչականուհի տիկին Վերա Գազանճեան, որ ողջունելէ ետք ներկաները արժեւորեց օրուան իմաստը:

Գեղարուեստական յայտագրին իր մասնակցութիւնը բերաւ վարչականուհի տիկին Ծովակ Թաշճեան, որ սաքսոֆոնի վրայ իգական սեռի յատուկ վայելչութեամբ նուագեց ընտրուած երգերու փունչ մը՝ արժանանալով հիւրերու բարձր գնահատանքին:

Խումբ մը սիրասուն օրիորդներ նոյնանման տարազով եւ ոճով հրամցուցին օտար երգերու շարան մը եւ ճոխացուցին մթնոլորտը:

Մեծ Պահքի յատուկ ճաշերու տեսակը, սիրալիր վերաբերումը, վիճակահանութենէն շահող տիկիններուն ուրախութիւնը, նուիրատուներու սրտաբուխ նուէրները աւելի ջերմացուցին մթնոլորտը, եւ հաճելի ու բարձր տրամադրութիւններով բաժնուեցան սրահէն՝ դարձեալ հանդիպելու խոստումներով:

Գնահատանքի արժանի միջոցառում, որուն համար շնորհաւորելի են ՀԲԸՄ-ի Լիբանանի Տիկնանց համախմբումի վարչականուհիները, գլխաւորութեամբ ժրաջան եւ անխոնջ ատենապետուհի տիկին Գալին Վանլեան Եաւէրեանի, որոնք ոչ մէկ ջանք խնայած էին ձեռնարկի յաջողութեան:

Շնորհակալութիւն ձեզի, ազնի՛ւ տիկիններ: Ձեր վարձքը կատար:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին