«ԶԱՐԹՕՆՔ», ՊԷՅՐՈՒԹ – Թուրքիոյ իշխող «Արդարութիւն եւ զարգացում» կուսակցութիւնը (ԱԶԿ), ի թիւս այլ խոշոր քաղաքներու, Մարտ 31-ին ՏԻՄ ընտրութիւններու արդիւնքներուն համաձայն՝ կը կորսնցնէ նաեւ երկրի ամենամեծ քաղաքը՝ Սթամպուլը։
Այս մասին, ինչպէս կը հաղորդէ «Արմէնփրես»-ը, կը յայտնէ թրքական haberler.com-ը:
Թուրքիոյ Բարձրագոյն ընտրական յանձնաժողովի (ԲԸՀ) նախագահ Սատի Կիւվենի հաղորդմամբ՝ Սթամպուլի մէջ յառաջադրուած գլխաւոր ընդդիմադիր Ժողովրդահանրապետական կուսակցութեան (ԺՀԿ) թեկնածու Էքրեմ Իմամօղլուն հաւաքած է 4 մլն 159 հազար 650, իսկ իշխող ԱԶԿ-ի թեկնածու նախկին վարչապետ Պինալի Եըլտըրըմը՝ 4 մլն 131 հազար 751 ձայն:
Այսպիսով, համաձայն Թուրքիոյ ԲԸՀ նախագահի հաղորդումին, ընդդիմադիր ԺՀԿ թեկնածուն իշխող ԱԶԿ թեկնածուէն առաջ է 28 հազար ձայնով:
Մինչեւ Ապրիլ 2 ժամը 15:00 թեկնածուները իրաւունք ունին բողոքարկելու ընտրութեան արդիւնքները:
