Հինգշաբթի, 25. 07. 2024

spot_img

Արցախը Նախորդ Շաբաթ (լուսանկարներ)

ՆՈՐԱՅՐ ՅՈՎՍԷՓԵԱՆ

«Զարթօնք»ի Արցախի Աշխատակից

Փաշինեան-Ալիեւ Առաջին Պաշտօնական Հանդիպումը Եւ Արցախեան Արձագանգը

Մարտ ամսուան վերջին շաբթուան ընթացքին ազրպէյճանա-ղարաբաղեան հակամարտութեան շուրջ հիմնական զարգացումները կապուած էին Փաշինեան-Ալիեւ առաջին պաշտօնական հանդիպումին հետ: Նախ անորոշ էր՝ կը հանդիպի՞ն, թէ ոչ: Հանդիպումէն եւ կարծիքներէն ու պաշտօնական գնահատականներու հրապարակումէն ետք ալ իրավիճակը էական չփոխուեցաւ: Մեկնաբանութիւնները առատ են՝ շփոթեցնելու չափ: Այս պարագային խնդիրը արդէն ոչ այնքան այդ բազմազանութիւնը հաւաքելը, որքան այդ բազմազանութեան մէջ ընդհանուր օրինաչափութիւններ գտնելն է: Արդեօք արդարացա՞ն հանդիպումէն առաջ բարձրաձայնուած ակնկալիքները:

Վիեննայի մէջ Փաշինեան-Ալիեւ հանդիպումը անցած է դրական եւ կառուցողական մթնոլորտի մէջ: Նման գնահատական տուած են ԵԱՀԿ Մինսկի խումբի համանախագահները: «Հանդիպումը հնարաւորութիւն ընձեռած է երկու ղեկավարներուն համար պարզաբանելու իրենց դիրքորոշումը: Միտքեր փոխանակած են կարգաւորումի գործընթացին վերաբերող շարք մը հիմնական հարցերու շուրջ: Երկու ղեկավարները ընդգծած են խաղաղութեան նպաստող միջավայր ստեղծելու եւ բանակցային գործընթացին մէջ հետագայ յստակ եւ զգալի քայլերու ձեռնարկելու կարեւորութիւնը՝ հակամարտութեան խաղաղ կարգաւորումին հասնելու նպատակով: Վերյիշելով իրենց զրոյցը Տուշանպէի մէջ՝ առաջնորդները հաստատած են իրենց հաւատարմութիւնը հրադադարի ամրապնդումին եւ անմիջական շփման համակարգերու բարելաւումին: Երկուստեք համաձայնած են նաեւ մարդասիրական ոլորտին մէջ շարք մը գործընթացներ զարգացնելու շուրջ»,– ըսուած է համատեղ յայտարարութեան մէջ:

Հանդիպումը դրական գնահատած է նաեւ Նիկոլ Փաշինեանը: Հայաստանի վարչապետը Աւստրիոյ հայ համայնքի ներկայացուցիչներուն հետ հանդիպումին Ազրպէյճանի նախագահին հետ ունեցած հանդիպումին անդրադարձած է, որուն առթիւ դրական արձագանգ հնչած է նաեւ Պաքուէն: Ազրպէյճանի նախագահ Իլհամ Ալիեւի գնահատմամբ՝ հանդիպումը անցած է կառուցողական մթնոլորտի մէջ:

ՄԱԿ-ի գլխաւոր քարտուղար Անթոնիօ Կուտերեշը ողջունած է Վիեննայի մէջ Մարտ 29-ին ԵԱՀԿ Մինսկի խումբի հովանիին ներքոյ Հայաստանի Հանրապետութեան վարչապետ Նիկոլ Փաշինեանի եւ Ազրպէյճանի նախագահ Իլհամ Ալիեւի առաջին պաշտօնական հանդիպումը: Այդ մասին կը տեղեկանանք ՄԱԿ-ի գլխաւոր քարտուղարութեան կայքէն:

Ստեփանակերտի մէջ Փաշինեան-Ալիեւ առաջին պաշտօնական հանդիպումը նաեւ ուղեկցող զարգացումներու լոյսին տակ կը դիտարկեն: «Սա երկու ղեկավարներու առաջին հանդիպումն էր, որ կազմակերպուած է Մինսկի խումբի համանախագահներուն կողմէ՝ անով իսկ փաստելով միջնորդական այս ձեւաչափի կենսունակութիւնը»,– կ’ընդգծէ վերլուծաբան Վահրամ Աթանեսեանը:

Արցախէն Փաշինեան-Ալիեւ հանդիպումին առթիւ գնահատականները Ստեփանակերտի մէջ զգուշաւոր լաւատեսական են: «Եթէ երկխօսութեան հնարաւորութիւնը կայ, կը նուազի ռազմական հարթութեան վրայ իրավիճակը լարելու հաւանականութիւնը»,– կը գնահատէ Արցախի նախագահի աշխատակազմի տեղեկատուութեան գլխաւոր վարչութեան պետ Դաւիթ Պապայեանը:

Քննարկուած հարցերուն մասին կարելի է ենթադրել համանախագահներու կատարած յայտարարութենէն: Նոյնինքն անոր հիման վրայ Վահրամ Աթանեսեանը կ’ենթադրէ, որ սեղանին դեռ Մատրիտեան մօտեցումներն են կամ անոնց վերաձեւակերպուած տարբերակները: Փաշինեան-Ալիեւ առաջին պաշտօնական հանդիպումը աւելի քան 3 ժամ տեւած է: Կատարուած յայտարարութիւնները, բնականաբար, մանրամասնութիւնները չեն բացայայտեր: Արդեօք քննարկուա՞ծ է բանակցութիւններուն Ստեփանակերտի մասնակցութիւնը վերականգնելու հարցը՝ դեռ պարզ չէ: Որ հարցը օրակարգի վրայ եղած է, ակամայ հաստատեց Ալիեւը՝ Վիեննայի հանդիպումէն ետք յղում ընելով միջնորդներու նախկին յայտարարութեան, թէ բանակցային ձեւաչափի փոփոխութիւն կրնայ ըլլալ բոլոր կողմերուն համաձայնութեամբ եւ յաւելելով, թէ Ազրպէյճանը իր համաձայնութիւնը չէ տուած:

Դաւիթ Պապայեան կը յիշեցնէ, թէ ի սկզբանէ չկար համոզում, որ Պաքուն միանգամայն կը համաձայնի, բայց համոզուած է, որ թեման կը մնայ օրակարգի վրայ: «Համոզուած եմ, որ հարցը քննարկուած է եւ օրակարգի վրայ պիտի մնայ: Այլ կերպ չէր ալ կրնար ըլլալ: Անհնար եւ անթոյլատրելի է, որ մեր ճակատագիրը առանց մեր մասնակցութեան որոշուի»,–  ընդգծած է Դաւիթ Պապայեանը:

Ստեփանակերտը այս պահուն ալ կարգաւորումի գործընթացէն դուրս չի մնար՝ առնուազն տեղեկութիւն փոխանակելու տեսակէտէն: Վիեննայի մէջ կայացած հանդիպումէն առաջ եւ հանդիպումէն ետք Փաշինեան-Սահակեան հեռախօսազրոյցները այդ կը փաստեն: Իսկ երբ այդ մասին տեղեկութիւնը Հայաստանի վարչապետի պաշտօնական կայքը կը տարածէ, տեղեկութեան պարզ փոխանակումը կը դառնայ քաղաքական պատգամ: Թերեւս դեռ ոչ բաւարար, բայց միանգամայն հասկնալի եւ տեսանելի:

Յստակացումները՝ Նախարարներուն Կողմէ

«Ներկայ պայմանաւորուածութիւնները չեն չեղարկեր նախկինները»,–  յայտարարած է Հայաստանի արտաքին գործոց նախարարը: Զոհրապ Մնացականեանը յատուկ ընդգծած է յետապրիլեան՝ Վիեննայի, Փեթերսպուրկի եւ հետագայ պայմանաւորուածութիւնները ի կատար ածելու անհրաժեշտութիւնը:

Մէկ այլ պատգամ հնչեց Միացեալ Նահանգներէն: Նիւ Եորք գտնուող ՀՀ պաշտպանութեան նախարարը յայտարարեց տարածքային զիջումներ անվտանգութեան դիմաց բանաձեւը անընդունելի է: «Նոր պատերազմը պիտի նշանակէ նոր տարածքներ վերցնել»,– յայտարարած է Դաւիթ Տօնոյեանը: Փոխարէնը՝ հայկական զինուժը կը վերանայի իր ընելիքները՝ նոր մարտահրաւէրներուն համահունչ: «Պիտի աւելցնենք գրոհային ստորաբաժանումները, որոնք մարտը անմիջականօրէն հակառակորդի տարածքին պիտի իրականացնեն: Մենք չենք պատրաստուիր միայն պաշտպանուելու»,– նշած է նախարար Տօնոյեանը: Ինչպէս կ’ըսեն՝ մեկնաբանութիւնները աւելորդ են:

 

Արցախցի Փոքրիկը Կը Յաւակնի Ռուսական «Կոլոս» Երաժշտական Նախագիծի Յաղթողի Տիտղոսին

Փոքրիկ ղարաբաղցին կը պատրաստուի Ռուսիոյ «Կոլոս» երաժշտական նախագիծի եզրափակիչին: «Արցախի ձայներ»-ի մէջ շատոնց հասունցած էր ռուսական հերթական նախագիծին՝ «Կոլոս»-ին ներկայանալու գաղափարը: Դժուարութիւնները յաղթահարուեցան, եւ «Արցախի ձայներ» երաժշտական նախագիծի կրտսեր անդամներէն մէկը՝ 10 տարեկան Միքայէլ Գրիգորեանը, նոյն ինքը՝ Միշան, յայտնուեցաւ Մոսկուա: «Շատ կը սիրեմ ֆութպոլ խաղալ, նկարել, շատ կը սիրեմ նաեւ թուաբանութիւնը եւ լողալը»,– կը թուարկէ բազմաշնորհ փոքրիկը: Բայց ինքզինք երգարուեստի մէջ կը տեսնէ: Մայրը երաժշտութեան դասատու է, հայրը՝ ՊԲ նուագախումբի խմբավարը: Միշան երգել սկսած է 4 տարեկանէն: 5 տարեկանէն արդէն «Արցախի ձայներ»-ի կազմին մէջ Ֆրանսա եւ Գերմանիա մեկնած է: Աւելի ուշ, «Նոր ալիք»-ին եւ «Եւրատեսիլ»-ին Հայաստանը ներկայացուցած է: Երկրէ-երկիր մեկնիլը արդէն իր առօրեային մաս դարձած է: Կը վերցնէ բեմական հագուստը, սիրած սրբապատկերը: Պատրաստուելու համար ժամանակ չի պահանջուիր: «Ինծի ճանապարհորդութեան նախապատրաստուելու համար հինգ վայրկեան ալ բաւական է»,– կը ծիծաղի Միքայէլը: Նոյնինքն այսպէս ալ օր մը Մոսկուա մեկնեցաւ: Նախքան «Կոլոս»-ի կոյր լսումները 5-6 հազար թեկնածուներէն ընտրուած 70 մասնակիցներու շարքին էր: Շարունակութիւնը ռուսական «Առաջին ալիք»-ի եթերին վրայ էր:

Երգեց ու ներկայացաւ Միշա Գրիգորեան, Ստեփանակերտ, Հայաստան: Միքայէլը կը խոստովանի, որ ներկայանալու համար առանձնապէս չէ պատրաստուած. Հիւրընկալողներն ալ դէմ չէին, որ ինքը ներկայացնէ իր ծննդավայրը: ««Առաջին ալիք»-ը ինծի ըսաւ, որ կրնամ ներկայացնել Ստեփանակերտը: Այդպէս ալ ըրած եմ»,– արդէն Ստեփանակերտի մէջ կը վերյիշէ Միքայէլը:

Կոյր լսումները յաջողապէս յաղթահարելէ ետք Միքայէլը յաղթարշաւը շարունակեց, ինչը հեռուստադիտողը շուտով կը տեսնէ ռուսական «Առաջին ալիք»-ի եթերին վրայ: «Միշան անկէ ետք անցաւ եւս երեք փուլ: Հիմա կը պատրաստուինք վերջին երկու փուլերուն»,– «Արցախի ձայներ» երաժշտական նախագիծի գեղարուեստական ղեկավար Լիրա Քոչարեանը կը պատմէ այն, ինչ հեռուստադիտողները պիտի տեսնեն դեռ մի քանի ամիս անց: Միշան հասած է եզրափակիչ փուլին եւ բոլոր հնարաւորութիւնները ունի յաղթող դառնալու համար:

            «Կոլոս»-ի վարկանշային աղիւսակին մէջ փոքրիկ ղարաբաղցին այս պահուն առաջին հորիզոնականի վրայ է: Կարճ ժամանակով Ստեփանակերտ է, բայց պարապմունքները չի դադրեցներ. օրը մի քանի ժամ կը յատկացնէ՝ եզրափակիչին պատրաստուելու համար:

Ստեփանակերտ

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին