Շաբաթ, 20. 07. 2024

spot_img

«Նոր Օր»-ի կազմակերպութեամբ՝ Թումանեանն ու Թէքէեանը թեւածեցին Լոս Անճելըսի մէջ (լուսանկարներ)

ՆՈՐ ՕՐ, ԼՈՍ ԱՆՃԵԼԸՍ.- Գրական երեկոյէ մը շատ աւելին էր Հինգշաբթի, 21 Մարտի հանդիսութիւնը նուիրուած «Ամենայն հայոց բանաստեղծ» անմահանուն Յովհաննէս Թումանեանին ծննդեան 150-ամեակին եւ «Բանաստեղծութեան իշխան» Վահան Թէքէեանի 140-ամեակին, որ տեղի ունեցաւ Պրպենքի Առաջնորդարանի «Գալայճեան» սրահին մէջ։ Ազգային զարթօնքի, ինքնաքննութեան եւ ինքնաարժեւորման պահ մըն էր, որուն ներկայ շուրջ 300 լոսանճելըսահայ գրասէրները ապրեցան հայ քնարերգութեան, հայ քերթողութեան մարգարտեայ պահեր։ Աւելի քան երկու ժամ տեւած յայտագիրը աննկատ անցաւ փրոֆեսորներ Սամուէլ Մուրադեանի եւ Արծրուն Աւագեանի հաղորդականութեան ու անսպառ պաշարին շնորհիւ, գրական-գեղարուեստական հաճոյք պատճառելով ներկայ գրասէր հանրութեան։

Հարկ է նշել, թէ Երեւանի Պետական Համալսարանի Հայ բանասիրութեան բաժանմունքի դեկանն է Դոկտ.-Փրոֆ. Արծրուն Աւագեանը, իսկ նոյն համալսարանի Հայ գրականութեան ամբիոնի վարիչն է Դոկտ.-Փրոֆ. Սամուէլ Մուրադեանը։ Ժամանակակից երկու մեծութիւններ՝ 19-20-րդ դարերու հայ գրականութեան երկու տիտաններու մասին։ Անկեղծօրէն, լոսանճելըսահայութիւնը կարօտ էր նման գրական վայելքի, ուր Թումանեանի եւ Թէքէեանի միջոցով, անոնց կեանքին ու գործին միջոցով վերաիմաստաւորուեցաւ հայու մեր ինքնութիւնը։

Հանդիսութիւնը կը վայելէր Հիւսիսային Ամերիկայի Արեւմտեան թեմի առաջնորդ՝ Գերաշնորհ Տ. Յովնան արքեպիսկոպոս Տէրտէրեանի ներկայութիւնն ու հովանաւորութիւնը։ Ներկայ էին նախկին առաջնորդ՝ Գերշ. Վաչէ Արք. Յովսէփեան, վերապատուելի Ճօ Մաթոսեան, արժանապատիւ հոգեւոր հայրեր, ՀՀ Գլխաւոր հիւպատոս Դոկտ. Արմէն Բայբուրդեան, ազգային քաղաքական եւ մշակութային միութիւններու եւ մամուլի ներկայացուցիչներ, գրասէր հոծ բազմութիւն մը։ «Քաշաթաղի բազմազաւակ ընտանիքներ» հիմնադրամի հիմնադիր, ԵՊՀ-ի Արեւելագիտութեան բաժանմունքի ղեկավար Փրոֆ. Գուրգէն Մելիքեան եւ Հայոց լեզուի պատմութեան ամբիոնի դոցենտ Նորայր Պօղոսեան նոյնպէս ներկայ էին գրական երեկոյին։

Փրոֆ. Սամուէլ Մուրադեան «Յաւիտենական Թումանեանը» ընդհանուր խորագիրին տակ ներկայացուց անոր գրականութիւնը՝ կեանքին ընդմէջէն։ Իսկ Փրոֆ. Աւագեան անդրադառնալով իր նոր գիրքին՝ «Վահան Թէքէեան. Ազնուական քերթողը», վեր հանեց Թէքէեանի գրական արժէքը, սփիւռքահայու ցաւերը։

Նորատիպ հատորը ներկայացուց “The Armenian Observer” շաբաթաթերթի արտօնատէր եւ խմբագիր Փրոֆ. Օշին Քէշիշեանը, ակնարկելով գիրքին իւրաքանչիւր գլուխին։

Հայրենի հիւր դասախօսներուն եւ «Նոր Օր»-ի խմբագրութեան գնահատագիրեր յանձնեց Կլենտէյլի Քաղաքային խորհուրդի անդամ Պրն. Վրէժ Աղաջանեան։

Գեղարուեստական մասով հանդէս եկան՝ Երեւանի Կոմիտասի անուան երաժշտանոցի շրջանաւաւարտներ Զուարթ Ճուլհայեան, սրինգ («Երազ» եւ «Կիլիկիա»), ապա՝ Երեւանի օփերայի մեներգիչ Սուրէն Մկրտչեան, դաշնամուրի ընկերակցութեամբ Արմինէ Ղազարեանի (Անցորդի երգը, «Անոյշ» օփերայէն)։  Վահան Թէքէեանի բառերով եւ Վահան Պէտէլեանի երաժշտութեամբ «Աստուծոյ» ուղղուած Ձօնը մեներգեց հայ համայնքի հանրածանօթ երգիչ Դաւիթ Սամուէլեան։

Հանդիսութեան ընթացքին ողջոյնի եւ շնորհակալութեան խօսքով ելոյթ ունեցան «Նոր Օր»-ի խմբագիր Հրաչ Սեփեթճեան եւ ՌԱԿ Կեդրոնական վարչութեան անդամ, ՌԱԿ Արեւմտեան Ամերիկայի Շրջանային վարչութեան ատենապետ՝ Տոքթ. Ռաֆֆի Պալեան։ Երեկոն հանդիսաւորապէս վարեց հայ համայնքէն ներս ծանօթ մտաւորական, ԼԱՐՔ երաժշտական դպրոցի փոխտնօրէն Թագուհի Արզումանեան։

Նորատիպ հատորի գինեձօնի արարողութենէն ետք, Հիւսիսային Ամերիկայի Արեւմտեան թեմի առաջնորդ՝ Գերաշնորհ Տէր Յովնան արքեպիսկոպոս Տէրտէրեանի փակման խօսքով եւ աղօթքով եզրափակուեցաւ երեկոն։

***

Նոյն օրը, Առաջնորդարանի «Փօլ եղբայրներ» դահլիճին մէջ «Նոր Օր»-ի կազմակերպութեամբ տեղի ունեցաւ նաեւ նկարիչ Շմաւոն Շմաւոնեանի նկարչական ցուցահանդէս-վաճառքը, ուր տեղադրուած էին բազմաթիւ մէկը միւսը գերազանցող արուեստի գործեր։ Վաճառուած նկարներուն հասոյթէն մաս մը արուեստագէտը նուիրեց «Քաշաթաղի բազմազաւակ ընտանիքներու» հիմնադրամին։

Շնորհակալութիւն բոլոր անոնց, որոնք իրենց նպաստը բերին մեծարելու Թումանեանն ու Թէքէեանը այդ գիշեր։ Միջոցառում մը, որ պիտի յիշուի լոսանճելըսահայ կեանքէն ներս։

ՆՈՐ ՕՐ

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին