«ԶԱՐԹՕՆՔ», ՊԷՅՐՈՒԹ – Մարտ 12-ին, 13-ին եւ 14-ին պիտի շարունակուի Հրանդ Տինքի սպանութեան դատավարութիւնը:
Պոլսահայ «Ակօս» թերթին հաղորդած տեղեկութիւններով՝ Պոլսոյ 14-րդ եղեռնադատ ատեանին մէջ կայանալիք դատական նիստին ընթացքին պիտի շարունակուին վկաներու լսումները: Ինչպէս ծանօթ է՝ այս դատավարութեան շրջագիծին մէջ կը դատուի 85 մեղադրեալ, որոնց հինգը բանտարկուած է:
Դատարանը նախորդ տարուան Դեկտեմբերին տեղի ունեցած նիստերուն ընթացքին ազատ արձակած էր նախկին զօրավարներէն Համզա Ճելեպօղլուն եւ Պոլսոյ ոստիկան զօրաց հրամանատարութեան կազմի լրաքաղութեան բաժինի աշխատակից Եաւուզ Գարագայան:
Նախորդ նիստերուն նման, այս նիստերուն եւս իրենց վկայութիւնները բերելու հրաւիրուած են ընդհանրապէս պետական պաշտօնեաներ: Այս է պատճառը, որ «Հրանդի ընկերները» հարթակը այս ոճիրին վերաբերեալ յաճախ կը վանկարկէ «Ոճրագործ պետութիւնը հաշիւ պիտի տա՛յ» նախադասութիւնը:
