Շաբաթ, 13. 07. 2024

spot_img

Դեբետ Գիւղը Գերադասելի Է Ֆրանքֆուրթէն

«Գաւառը» Լուսարձակի Տակ – 17 –

ՎԱՀԱՆ ԱՆՏՈՆԵԱՆ

«Զարթօնք»ի Աշխատակից

Այս արտասովոր պատմութիւնը շատ մարդոց համար կրնայ հեքիաթ համարուիլ, բայց բացարձակ իրականութիւն է: Հերոսուհին երեւանցի Տաթեւն է, որ 15 տարի Գերմանիոյ Ֆրանքֆուրթ քաղաքը քրտնաջան աշխատելէ ետք որոշեց տեղափոխուիլ Հայաստան եւ իր աշխատանքը շարունակել Լոռի մարզի Դեբետ գիւղը:

Երեւանի պետական համալսարանի թուաբանութեան բաժինը աւարտելէ ետք, 2003-ին կը մեկնի Գերմանիա, նախ կը հետեւի գերմաներէնի դասընթացներու, ապա կ’ընդունուի Մայնցի գեղաձեւութեան դպրոցը, ուր 5 տարի ուսանելէ ետք աշխատանքի կ’ընդունուի Ֆրանքֆուրթի հեղինակաւոր «ՍԻՍԻՃԻ» գեղաձեւութեան ընկերութեան մէջ եւ աւելի ուշ կը նշանակուի գեղարուեստական ղեկավար: Կը ստանայ Գերմանիոյ քաղաքացիութիւն: Տարին 2 անգամ այցելութեան կու գայ Երեւան իր ընտանիքին, կը շրջագայի աշխարհի տարբեր երկիրները: Ամէն ինչ լաւ է, բայց յուզական կողմը կը յուշէ իրեն, որ բան մը պակաս է: 2014-ին յուզականութիւնը կը հասնի գագաթնակէտին, եւ Տաթեւը կ’որոշէ վեց ամիսով արձակուրդ առնել՝ իր հոգեկան վիճակը բնականոն դարձնելու համար: Կ’այցելէ 14 երկիր` Հնդկաստանէն մինչեւ Պոլիվիա, վերջին հանգրուանը դարձնելով Հայաստանը:

Հայաստան գտնուելու ժամանակ իր մայրիկին հետ կ’որոշեն օր մը այցելութեան երթալ Դեբետ գիւղը ապրող  իրենց մէկ բարեկամուհիին, եւ այդ որոշումը անկիւնադարձ կը հանդիսանայ Տաթեւի կենսագրութեան մէջ. Ֆրանքֆուրթ աշխատող աղջիկը կը հմայի գիւղի գեղեցիկ միջավայրէն եւ մինչեւ Գերմանիա վերադառնալը կ’որոշէ տուն մը գնել, հաստատուիլ գիւղը եւ մասնագիտական աշխատանքը շարունակել այստեղ, քանի որ այդ աշխատանքը թուային արհեստագիտութեան ոլորտին կը պատկանի, եւ ընդամէնը մէկ համակարգիչ ու համացանց ունենալով կարելի է աշխարհին հետ կապ հաստատել:

Հայաստանի մէջ արտօնագիր ձեռք կը բերէ «Դեբետ Լայֆ» անուան տակ: Եռայարկ տուն մըն է, որ վերանորոգուելէ ետք կրնայ մինչեւ 8 հոգինոց պատուիրակութիւն ընդունիլ, քննարկումներ  կազմակերպել:

Տաթեւը յոյս ունի Հոկտեմբերին տան բացումը կատարել եւ 2020-ին արդէն ընդունիլ աշխատանքային պատուիրակութիւններ:

Երանի Տաթեւի այս որոշումը օրինակ հանդիսանայ արտասահմանի տարբեր երկիրներու մէջ իրենց աշխատանքով փայլող մեր հայրենակիցներուն, որ գան, շէնցնեն ու հզօրացնեն Հայաստանը:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին