Հինգշաբթի, 25. 07. 2024

spot_img

Ամերիկեան Բարքեր

ԳԷՈՐԳ ՔԷՕՇԿԷՐԵԱՆ

«Զարթօնք»ի Երէց Աշխատակից

Ինքնախաբէութեամբ եւ Մասամբ Նորին…

 

Մարդիկ զանազան միջոցներու կը դիմեն իրենց վրայ գութ հայցելու համար։ Խօսինք օրինակներով։

Ճեսի Սմոլեթ (տես նկարը) միասեռական դերասան մըն է, որ վերջերս ամերիկեան մամուլի բամբասանքներու բաժնին նիւթ դարձաւ իր տարօրինակ արկածախնդրութեամբ։ Հիմա թոյլ տուէք բացատրեմ։

Արդարեւ, Ճեսի «Ճեմել»-ի դերով հանդէս կու գար հեռատեսիլի նշանաւոր եւ ժողովրդական «Էմբայր» հաղորդաշարով։ Ան իւրաքանչիւր դրուագին համար կը ստանար 125,000 տոլար։ Ճեսի, դժգոհ իր ստացած վարձատրութենէն, աւելին պահանջելու մտադրութեամբ սարքած է հետեւեալ մթին արկածախնդրութիւնը, որուն ինք զոհ գնաց։

Ուրեմն ան կը վարձէ նիճերիացի ծնողներէ սերած ամերիկածին երկու եղբայրներ (տես նկարը)՝ Ապել եւ Օլա Օսունտարիօ անունով, որպէսզի գիշերով վրան յարձակին եւ դանակով լաւ մը վիրաւորեն զինք: Ճեսի այդ եղբայրներուն վճարած է 3,500 տոլար՝ որպէս վարձատրութիւն։

Արկածէն անմիջապէս ետք Ճեսի Շիքակոյի ոստիկանութեան գանգատ  ներկայացուցած է, թէ ինք սեւ եւ միասեռական ըլլալուն համար ենթարկուած է այդ ահարկու խոշտանգումին։ Աւելին, ան կը պահանջէ, որ յանցաւորները ձերբակալուին եւ ստանան իրենց համապատասխան պատիժը։

Դժբախտաբար թէ բարեբախտաբար, Շիքակոյի ոստիկանութիւնը իր մանրակրկիտ հարցաքննութեամբ շուտով կը պարզէ եղած խեղկատակութիւնը եւ կալանքի տակ կը դնէ խնդրոյ առարկայ «դերասան» դերասանը։ Ճեսիի սխալը այն էր, որ վճարագիրով տուած էր նիճերիացի եղբայրներուն վարձատրութիւնը։

Աւելին, Ճեսի կը կորսնցնէ նաեւ իր բաժինը հաղորդաշարի վերջին երկու դրուագներէն (episodes), առ ի պատասխան միւս դերակատարներու ներկայացուցած գանգատներուն, որովհետեւ կը պատճառաբանեն  անոնք, թէ Ճեսիի ստախօսութիւնը, որ լայն տարաձայնութիւն տեղիք տուաւ հանրութեան մօտ, պիտի վնասէ իրենց հաղորդաշարի ժողովրդականութան։

Ճակատագրի ի՜նչ անակնկալ եւ հետաքրքրական յեղաշրջում: Աւելիին ցանկացող Ճեսին ոչ միայն ստացած նիւթական վարձատրութիւնը կորսնցուց, այլեւ ժողովուրդին յարգանքն ու սէրը: «Խաբողին՝ խաբող ու կէս»,- պիտի ըսէր հայկական ասացուածքը։

 

Ինծի Նման Պուպրիկ մը…

Այս պատմութիւնը մեզի կու գայ Ուիսքանսին նահանգի Նիւ Պեռլին քաղաքէն։ Էյմի Ճանտրիսեվիչ (տես նկարը) ընկերային գործիչ (social Worker) մըն էր, որ կ’աշխատէր հիւանդանոցի մը՝ քաղցկեղով վարակուած մանուկներու բաժանմունքը։ Ան ձեռակերտ պուպրիկներ կ’օգտագործէր որպէս բուժումի (therapy) միջոց։

Հիմա Էյմի տունէն կ’աշխատի եւ պուպրիկներ (տես նկարները) կը շինէ անկարող (disabled) երեխաներու համար։ Անոր շինած պուպրիկները յատուկ են իւրաքանչիւր երեխայի՝ արտացոլացնելով այդ երեխայի անկարողութեան իրավիճակը։ Օրինակ՝ ի ծնէ կոյր երեխայ մը կամ անդամալոյծ երեխայ մը եւ այլն։

Էյմի այդ գործը սկսած է գոհացում տալու անկարող երեխաներու պահանջին, երբ անոնք փափաքած են, որ «ինծի նման պուպրիկ մը» շինէ։

Մենք գիտէինք, որ հիւանդագին երեխաներու համար հոգաբաններ կը թելադրէին ընտանի կենդանիներու բարեկամութիւնը, որոնց հոգածութիւնը դրական արդիւնք կու տար անոնց բուժումին։ Եւ ահա ուրիշ միջոց մըն ալ՝ հիւանդ երեխաներու բուժումին ի խնդիր…

Ես քաջալերական կը գտնեմ, որ մարդիկ տրամադիր են նոր միջոցներ որոնելու երեխաներուն, յատկապէս անբուժելի հիւանդութիւններէ տառապողներուն օգտակար հանդիսանալու եւ անոնց կեանքը ձեւով մը տանելի դարձնելու։ Պատիւս արժանաւորաց:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին