«ԶԱՐԹՕՆՔ», ՊԷՅՐՈՒԹ – Ամերիկայի Միացեալ Նահանգներու՝ Միջին Արեւելքի հարցերով պետական քարտուղարի տեղակալ Տեյվիտ Սաթըրֆիլտ շեշտեց Լիբանանի ինքնորոյն գործելու եւ որոշում կայացնելու անհրաժեշտութիւնը՝ առանց ազդուելու արտաքին միջամտութիւններէ: Սաթըրֆիլտ կ’ակնարկէր երկրին մէջ Իրանի ունեցած ազդեցութեան:
Պէյրութի մէջ Փաղանգաւոր կուսակցութեան նախագահ Սամի Ժմայէլի հետ հանդիպումէն ետք մամլոյ ասուլիսին ան ընդգծեց, որ Լիբանանի կայունութիւնն ու ապահովութիւնը պայմանաւորուած է երկրի ազգային ընտրութիւններով եւ ոչ թէ ուրիշներու պարտադրանքներով:
Ակնարկելով Իրանին՝ ան նշեց, որ Լիբանան բաւական երկար ժամանակ տուժած է այլոց յառաջ քաշած գաղափարախօսութենէն եւ հակամարտութիւններէն, աւելցնելով, որ երկիրը պէտք է վճռականօրէն դիմակալէ նման վնասաբեր միջամտութիւնները: