«ԶԱՐԹՕՆՔ», ՊԷՅՐՈՒԹ –Կաշառակերութեան արմատական վերացումը, Լիբանան հաստատուած աւելի քան մէկ միլիոն սուրիացի գաղթականներու ապահով տունդարձը եւ երկրի տնտեսական խարխափուն իրավիճակի վերընձիւղումը առաջնահերթութիւններն են Հզօր Լիբանան խորհրդարանական պլոքի նախարարներուն: Այս մասին մամլոյ ասուլիսի ժամանակ նշեց պլոքի նախագահ եւ արտաքին գործոց նախարար Ժպրան Պասիլ:
Միաժամանակ Ազգային ազատ հոսանք շարժումի Հզօր Լիբանան խորհրդարանական պլոքի նախարարները ներկայացուցին կառավարութեան կազմաւորումէն ետք 100 օրուան ժամանակահատուածի համար իրենց մշակած ծրագիրը:
Պասիլի հաղորդմամբ՝ նախարարները յայտարարեցին շարք մը էական նպատակներ, որոնց պիտի ճգնին ամէն գնով հասնելու՝ ի բարօրութիւն Լիբանանի ժողովուրդին եւ ի նպաստ երկրի գերագոյն շահերուն: