«ԶԱՐԹՕՆՔ», ՊԷՅՐՈՒԹ – Լիբանանի Հանրապետութեան ներքին գործոց նախարար Ռայա Ալ Հասան արաբական տարբեր երկիրներէ Լիբանան այցելելու մտադիր զբօսաշրջիկներուն հաւաստեց, որ երկրի ապահովութեան այժմու իրավիճակը ամբողջապէս հսկողութեան տակ է:
«Լիբանանի ապահովութեան գործակալութիւնները գործնապէս ապացուցած են իրենց արդիւնաւէտութիւնը,- Թունիսի մէջ արաբական պետութիւններու ներքին գործոց նախարարներու 36-րդ համաժողովին նշեց Հասան:- Բացի այդ՝ անոնք որոշակիօրէն մատնացոյց ըրած են, որ Լիբանանի պետութիւնը, կողքին ունենալով լիբանանեան բանակը, ի զօրու է ձեռնհասօրէն կատարելու իր պարտականութիւնները՝ պաշտպանելու երկիրը եւ պահպանելու ներքին ապահովութիւնն ու կայունութիւնը»:
Ան դիտել տուաւ, որ Լիբանան յաջողած է ահաբեկչութեան դէմ պայքայրի գծով՝ շնորհիւ երկրի ապահովութեան գործակալութիւններու ձեռնարկած գործողութիւններուն:
Նշենք, որ ներքին գործոց նախարար Ռայա Ալ Հասան ժամանեց Թունիս 2 Մարտին՝ մասնակցելու արաբական պետութիւններու ներքին գործոց նախարարներու համաժողովին, ուր կը գլխաւորէր պատուիրակութիւն մը՝ բաղկացած ներքին ապահովական ուժերու տնօրէն եւ հրամանատար Իմատ Օսմանէն եւ այդ ոլորտին մէջ շարք մը այլ պաշտօնատարներէ:
Լիբանանի Ներքին Ապահովութեան Այժմու Իրավիճակը Ամբողջապէս Հսկողութեան Տակ Է. Ներքին Գործոց Նախարար
