«ԶԱՐԹՕՆՔ», ՊԷՅՐՈՒԹ – Վարչապետ Նիկոլ Փաշինեանի գլխաւորութեամբ 2008 թուականի մարտիմէկեան իրադարձութիւններուն կապակցութեամբ Մարտ 1-ին մայրաքաղաք Երեւանի մէջ տեղի ունեցած է երթ:
Ինչպէս կը հաղորդէ «Արմէնփրես»-ը, ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ երթը, որուն մասնակցած են նաեւ վարչապետի տիկին Աննա Յակոբեանը եւ իր դուստրերը, մեկնարկած է Երեւանի Ազատութեան հրապարակէն, անցած Մաշտոցի պողոտայով, Գրիգոր Լուսաւորիչ փողոցով եւ աւարտած Միասնիկեանի արձանին մօտ:
Վարչապետ Փաշինեան ծաղկեսակ դրած ու յարգանքի տուրք մատուցած է բոլոր զոհերու յիշատակին:
Աւելի կանուխ, վարչապետ Նիկոլ Փաշինեան մարտիմէկեան իր ուղերձին մէջ անդրադարձած էր քայլերթի նշանակութեան՝ նշելով. «Մենք այս քայլերթով մեր յարգանքի տուրքը կը մատուցենք Մարտի 1-ի, քաղաքական բոլոր սպանութիւնների զոհերին եւ մեր վճռական ոչը կասենք բռնութիւններին, անարդարութեանը, ապօրինութիւններին, կոռուպցիային, ընտրակեղծիքներին, իրաւունքների ոտնահարմանը»:
