«ԶԱՐԹՕՆՔ», ՊԷՅՐՈՒԹ – Լիբանանի Հանրապետութեան խորհրդարանի նախագահ Նապիհ Պըրրի խնդրեց Եւրոպական Միութենէն գործուն դերակատարութիւն ցուցաբերել Լիբանանի ծովային սահմանը նշանակելու գործին մէջ: Այս մասին կը տեղեկանանք խորհրդարանի նախագահի տեղեկատուական գրասենեակի հրապարակած հաղորդագրութենէն:
Եւրամիութեան արտաքին քաղաքականութեան հարցերով գերագոյն յանձնակատար Ֆետերիքա Մոկերինիի հետ հանդիպումին Պըրրի բարձրաձայնեց վերոյիշեալ խնդիրը՝ դիտել տալով, որ Լիբանանի եւ Կիպրոսի ջրային տարածքը սահմանակից են, եւ Լիբանան կը գտնուի Եւրամիութեան սահմանին:
Զանազան առիթներով խորհրդարանի նախագահ Նապիհ Պըրրի զգուշացուցած է իսրայէլեան զաւթողական բնոյթի վտանգաւոր օրինախախտումներէն, որոնք ուղղակի կ’առնչուին Լիբանանի խնդրայարոյց պլոք 9-ի հարուստ նաւթապաշարի շահագործումներուն: