Խորը վշտով տեղեկացանք Առաքելական մեր Սուրբ Եկեղեցու հարազատ եւ սիրեցեալ զաւակ, ազգային մեծ բարերար, մեր ժողովրդի արժանաւոր դուստր Լուիզ Մանուկեան Սիմոնի մահուան մասին։
Սրտի մորմոքով սգում ենք մեծանուն հայուհու ցաւագին կորուստը, քաղցրութեամբ վերյիշում իր աստուածաշնորհ կեանքի ընթացքում ազգասէր ու եկեղեցանուէր ոգով պսակուած լուսեղէն իրագործումները, եկեղեցաշէն ու ազգանուէր գործերի բիւր արդիւնքները։
Բարեյիշատակ Լուիզ Մանուկեան Սիմոնը, որպէս հայրենասէր եւ եկեղեցանուէր հայուհի, աստուածաշնորհ լոյս ու օրհնութիւն էր ազգային ու եկեղեցական մեր կեանքին։ Նա նորովի ցոլացրեց փառքը Մանուկեան բարերար գերդաստանի՝ յիրաւի հանդիսանալով մեր իրականութեան մեծագոյն բարեգործ ու նուիրեալ: Բազում մեծագործութիւններն ու ազգաշէն իրագործումները Լուիզ Մանուկեան Սիմոնի անունը ոսկեղէն տառերով են արձանագրում հայոց մեծանուն բարերարների, ազգի երախտարժան զաւակների պատուաւոր ցանկում։
Ակնառու եւ նշանակալի են լուսահոգի Լուիզ Մանուկեան Սիմոնի բարեգործութիւնները աշխարհասփիւռ մեր ժողովրդի կեանքում եւ հայրենական անդաստանում: Նա երկար տարիներ որպէս Հայկական Բարեգործական Ընդհանուր Միութեան նախագահ եւ իր ողջ կեանքի ընթացքում անձնապէս եւ «Մանուկեան Սիմոն» հիմնադրամի միջոցով արդիւնաւորեց ազգանուէր ու հայրենանուէր իր առաքելութիւնը, սրտաբուխ բարերարութիւններով անգնահատելի ներդրում բերեց աղէտալի երկրաշարժի վէրքերի ամոքմանը, նորանկախ հայրենիքի զօրացմանը, Արցախի հիմնախնդիրների յաղթահարմանը, հայրենական մեր կեանքի առաջընթացին: Նրա շնորհիւ հիմնուեց ու կայացաւ Հայաստանի Ամերիկեան համալսարանը, իրականացուեցին բազում մշակութային ծրագրեր, վեր յառնեցին ուսումնական հաստատութիւններ, որոնց հարկի ներքոյ կրթւում ու հասակ են առնում սերունդներ: Մեր ժողովրդի երախտարժան դստեր առանձնայատուկ ուշադրութեան ու հոգածութեան ներքոյ էին նաեւ սփիւռքի մեր համայնքներն ու ազգային, կրթական, մշակութային հաստատութիւնները՝ ի խնդիր հայորդեաց ազգային ինքնութեան պահպանութեան եւ հայեցի դաստիարակութեան:
Առ մեր Սուրբ Եկեղեցին մշտավառ սիրով եւ նրա առաքելութեան արդիւնաւորման մեծ նախանձախդրութեամբ հոգելոյս Լուիզ Մանուկեան Սիմոնը բազմաթիւ բարեգործութիւններով շէնացրեց հոգեւոր-եկեղեցական մեր անդաստանը:
Նրա բարեգործութիւններն ընդգրկում են եկեղեցական կեանքի բոլոր ոլորտները. հոգեւորականաց նոր սերնդի պատրաստման առաքելութիւնը՝ Գեւորգեան հոգեւոր ճեմարանին եւ Վազգէնեան հոգեւոր դպրանոցին սատարումով, աջակցութիւնը Հայորդեաց տների, «Իզմիրլեան» բժշկական կենտրոնի, բարեգործական ճաշարանների գործունէութեանը, քաղաքամայր Երեւանում երեք եկեղեցիների կառուցումը եւ բազում այլ եկեղեցանպաստ ծրագրեր պարգեւ եղան մեր ազգին ու Եկեղեցուն՝ նրան արժանացնելով երկնային բիւր օրհնութիւնների: Լուիզ Մանուկեան Սիմոնը առանձնակի ջերմ զգացումով նպաստ է բերել Մայր Աթոռ Սուրբ Էջմիածնի պայծառութեանը, Սուրբ Էջմիածնի Մայր Տաճարի եւ իր սիրասուն ծնողաց՝ Ալէք եւ Մարի Մանուկեանների անունը կրող Գանձատան նորոգութեանը, նոր շինութիւնների կառուցմանը, մշտապէս աջակցել մայրավանքի բարեկարգութեանն ու կենսագործունէութեանը:
Մեր հոգում անջնջելի է մնալու լուսաւոր ու վեհանձն կերպարը Լուիզ Մանուկեան Սիմոնի՝ Մեզ հարազատ անձնաւորութեան, իր անկեղծ ու բարեսիրտ բարեկամութեամբ, պարզ ու անմիջական բնաւորութեամբ, մեծ հայրենասէրի վսեմ նկարագրով։ Լուսահոգի Լուիզ Մանուկեան Սիմոնի պայծառ ու անմոռաց յիշատակը միշտ ապրելու է Հայրապետիս սրտում եւ մեր ժողովրդի, որ քաջ գիտէ գնահատել ու մեծարել իր հերոս զաւակներին, հիւսել նրանց փառքը եւ այդպիսի վառ օրինակներով ոգեշնչել նոր սերունդներին։ Հոգելոյս Լուիզ Մանուկեան Սիմոնը շարունակում է իր ուղին դէպի անմահութիւն։ Յիրաւի, «մահկանացու ծնեալ անմահ զիւրն յիշատակ եթող»:
Վշտացեալ սրտով, յանուն Գերագոյն Հոգեւոր Խորհրդի եւ Մայր Աթոռ Սուրբ Էջմիածնի միաբանութեան, Մեր խորին ցաւակցութիւնն ենք յայտնում ննջեցեալի եղբօրը՝ ազգային մեծ բարերար Ռիչարդ Մանուկեանին, զաւակներին՝ սիրելի Մարկին, Դեյվիդին եւ Քրիսին, սիրասուն թոռներին:
Աղօթում ենք, որ Բարեգութ Տէրը երկնքի արքայութեան լուսեղէն խորաններում հանգստութեան ու լոյսերի մէջ ընդունի հոգին նորոգ հանգուցեալ Իր բարեպաշտ աղախնու: Հանգչիր խաղաղութեամբ, սիրելի Լուիզ, եւ ըստ փրկչական խոստման՝ «մտիր քո Տիրոջ ուրախութեան մէջ» (Մատթ. 25.21)՝ վայելելու յաւիտենական անանց երանութիւն:
Խունկ, աղօթք եւ օրհնութիւն Քո վառ ու անմար բարի յիշատակին:
Վշտակիր սրտով եւ օրհնութեամբ՝
ԳԱՐԵԳԻՆ Բ.
ԿԱԹՈՂԻԿՈՍ ԱՄԵՆԱՅՆ ՀԱՅՈՑ
