«ԶԱՐԹՕՆՔ», ՊԷՅՐՈՒԹ – Ազրպէյճանի մայրաքաղաք Պաքուի քաղաքապետարանը մերժած է ընդդիմադիր Ժողովրդավարական ուժերու ազգային խորհուրդին կողմէ Փետրուար 23-ին հանրահաւաք իրականացնելու վերաբերեալ դիմումը:
Այս մասին, ինչպէս կը հաղորդէ «Արմէնփրես»-ը, կը յայտնեն ազրպէյճանական լրատուամիջոցները:
Քաղաքապետարանը մերժումը հիմնաւորած է անով, որ Յունուար 19-ին Ժողովրդավարական ուժերու ազգային խորհուրդի կազմակերպած նախորդ հանրահաւաքին ժամանակ խախտուած է հասարակական կարգը:
Խորհուրդը Պաքուի քաղաքապետարանէն խնդրած էր Փետրուար 23-ին՝ ժամը 15-ին, տրամադրել «Մահսուլ» մարզադաշտը եւ թոյլատրել այդտեղ իրականացնել հանրահաւաքը: