«ԶԱՐԹՕՆՔ», ՊԷՅՐՈՒԹ – Հայաստանի Հանրապետութեան նախագահ Արմէն Սարգսեան, որ աշխատանքային այցով կը գտնուի Գերմանիոյ Դաշնային Հանրապետութիւն, Փետրուար 17-ին Միւնխենի մէջ հանդիպած է Սերպիոյ նախագահ Ալեքսանտար Վուչիչի հետ։
Ինչպէս կը հաղորդէ «Արմէնփրես»-ը, Հայաստանի Հանրապետութեան նախագահի աշխատակազմի հասարակայնութեան հետ կապերու վարչութենէն կը տեղեկացնեն, թէ Հայաստանի եւ Սերպիոյ նախագահները համակարծիք եղած են, որ դարերու պատմութիւն ունեցող հայ-սերպական յարաբերութիւնները, երկու ժողովուրդներու պատմամշակութային առնչութիւններն ու ընդհանուր արժէքները լաւ հիմք կը ստեղծեն տարբեր ոլորտներու մէջ գործակցութեան զարգացման համար։
Սերպիոյ նախագահը վերահաստատած է Հայաստանի մէջ դեսպանութիւն բանալու իր երկրի մտադրութիւնը, ինչը նոր խթան կրնայ հանդիսանալ գործակցութեան խորացման համար։
