«ԶԱՐԹՕՆՔ», ՊԷՅՐՈՒԹ – Լիբանանի մէջ Միացեալ ազգերու կազմակերպութեան նորանշանակ համակարգող Եան Քուպիշ ժամանեց Պէյրութ՝ ստանձնելու իր պաշտօնը: Այս մասին Փետրուար 11-ին յայտարարեց ՄԱԿ-ը:
Սլովաքիոյ քաղաքացի Եան Քուպիշ, որ անցեալ ամիս վերոյիշեալ պաշտօնին նշանակուեցաւ ՄԱԿ-ի ընդհանուր քարտուղար Անթոնիօ Կութերեշի կողմէ, պիտի փոխարինէ Դանիոյ Թագաւորութեան յատուկ համակարգող Փերնիլ Տահլեր Քարտելը, որ այդ պաշտօնին վրայ կը գործէր 2017-ի Նոյեմբերէն:
«Ես շատ ուրախ եմ Պէյրութ գտնուելուս համար, մանաւանդ որ Լիբանանը բոլորովին նոր փուլ թեւակոխած է կառավարութեան կազմաւորումէն ետք»,- ըսաւ Քուպիշ Պէյրութի Ռաֆիք Հարիրի միջազգային օդակայանին մէջ՝ ըստ ՄԱԿ-ի յայտարարութեան:
Լիբանանի Մէջ ՄԱԿ-ի Նորանշանակ Համակարգողը Ժամանեց Պէյրութ
