«ԶԱՐԹՕՆՔ», ՊԷՅՐՈՒԹ – Արաբական պետութիւններու լիկայի ընդհանուր քարտուղար Ահմատ Ապուլ Ղեյթ Երկուշաբթի կը ժամանէ Լիբանան, ինչպէս կը հաղորդէ Պաապտայի նախագահական պալատին մօտ աղբիւր մը:
Աղբիւրը նաեւ յայտնեց «The Daily Star» լրատուական գործակալութեան, որ Ապուլ Ղեյթի այցելութեան նպատակն է շնորհաւորել Լիբանանի բարձրաստիճան պաշտօնատարները կառավարութեան կազմաւորման առիթով, որ տեղի ունեցաւ Յունուար 31-ին շուրջ 9-ամսեայ փակուղիէ ետք:
Տեղական օրաթերթը՝ «Ալ Ժումհուրիա»-ն, հաղորդեց, որ այցի ծիրին մէջ Ապուլ Ղեյթ Լիբանանի պաշտօնատար անձանց հետ պիտի ունենայ քննարկումներ Արաբական պետութիւններու լիկային հետ կապուած հարցերու շուրջ, ներառեալ Սուրիոյ Հանրապետութեան հաւանական վերադարձը տարածաշրջանային կազմակերպութեան:
Նշենք, որ Ապու Ղեյթի այցը կը համընկնի Իրանի Իսլամական Հանրապետութեան արտաքին գործոց նախարար Մուհամմատ Ճաւատ Զարիֆի՝ Լիբանանի Հանրապետութիւն այցին: Վերջինս հանդիպում պիտի ունենայ նախագահ Միշէլ Աունի եւ արտաքին գործոց նախարար Ժպրան Պասիլի հետ:
Արաբական Պետութիւններու Լիկայի Ընդհանուր Քարտուղարը Երկուշաբթի Կը Ժամանէ Լիբանան
