Համացանցի Վրայ
Թուրքիոյ քրտական «Ժողովուրդներու դեմոկրատական» կուսակցութեան հայ պատգամաւոր Կարօ Փայլան իր համերաշխութիւնը յայտնած է քրտական «Ժողովրդավարական հասարակութեան քոնկրէս»–ի կին համանախագահ Լէյլա Կիվուէնին։
Փայլան, Twitter–ի իր էջին մէջ լուսանկար հրապարակած է ու գրած,- «91 օր հացադուլի մէջ գտնուող Լէյլա Կիվուէնի համար համերաշխութեան հերթապահութեան մէջ ենք»։
Նշենք, որ կալանքի տակ գտնուած Լէյլա Կիվուէնը՝ Ապտուլլահ Օճալանի դէմ իրականացուող սահմանափակումներուն դէմ՝ հացադուլ սկսած էր։ Օրեր առաջ, դատարանը անոր առողջական վիճակը հաշուի առնելով՝ ազատ արձակած է, սակայն ան տան մէջ կը շարունակէ հացադուլը։ Կին գործիչը կը պահանջէ վերջ դնել Ապտուլլահ Օճալանի հետ հանդիպումներու արգելքին եւ արտօնել անոր հետ շփուիլ։
