«ԶԱՐԹՕՆՔ», ՊԷՅՐՈՒԹ – Լիբանանի շարք մը պաշտօնատարներ լաւատեսութիւն յայտնեցին ազգային միասնական նորակազմ կառավարութեան կապակցութեամբ: Ի դէպ, նորանշանակ նախարարները բարձրաձայնեցին իրենց ապագայի ծրագիրներն ու հեռանկարները՝ ի նպաստ երկրի բարգաւաճումին, ժողովուրդի կենսամակարդակի բարձրացումին եւ տնտեսական անելանելի կացութեան հանգուցալուծումին:
Իր կարգին, մարոնի համայնքի պատրիարք Պշարա Ռաաի ջերմօրէն շնորհաւորեց Հանրապետութեան նախագահ Միշէլ Աունը եւ վարչապետ Սաատ Հարիրին այս կարեւոր նուաճումին համար: Այս մասին կը նշուի մարոնի եկեղեցւոյ հրապարակած յայտարարութեան մէջ:
«Ռաաի յոյս յայտնեց, որ նորակազմ կառավարութիւնը յաջողապէս պիտի կատարէ իր պարտականութիւնները եւ, ի գին ամէն զոհողութեան, պիտի կարենայ վերացնել անցնող ինը ամիսներուն ծայր առած նորանոր խնդիրներու փաղանգը»,- ըսուած է յայտարարութեան մէջ:
Լիբանանի Պաշտօնատար Անձինք Յոյս Կը Յայտնեն Նորակազմ Կառավարութեան Կապակցութեամբ
