«ԶԱՐԹՕՆՔ», ՊԷՅՐՈՒԹ – Վենեզուելայի ընդդիմադիր ուժերը ներքին կարգով բանակցութիւններ կը վարեն զինուած ուժերուն հետ՝ նախագահ Նիքոլաս Մատուրօն իշխանութենէն զրկելու նպատակով:
«Արմէնփրես»-ի հաղորդմամբ` այս մասին կը գրէ «ԹԱՍՍ»-ը: «Մենք ղեկավարութեան անունով բանակցութիւններ կը վարենք քաղաքացիներուն եւ զինուած ուժերուն հետ: Տեղի կ’ունենան հանդիպումներ՝ առանց մեծ ուշադրութիւն բեւեռելու այս ամէնուն վրայ»,- ըսած է ընդդիմադիր ուժերու առաջնորդ Խուան Կուայտօն:
Յիշեցնենք, որ Յունուար 23-ին Վենեզուելայի բազմաթիւ քաղաքներուն մէջ տեղի ունեցած են ընդդիմութեան բողոքի ցոյցեր, որոնք վերաճած են ոստիկանութեան եւ Ազգային թիկնազօրներուն հետ ընդհարումներու: Հասարակական կազմակերպութիւններուն տուեալներով՝ մահացած է ցոյցերու առնուազն 26 մասնակից: Բերման ենթարկուած են Յունուար 21-էն շարունակուող բողոքի ցոյցերուն մասնակիցներ 364-ն:
