«ԶԱՐԹՕՆՔ», ՊԷՅՐՈՒԹ – ՀՀ վարչապետ Նիկոլ Փաշիեան Տաւոսի համաշխարհային տնտեսական համաժողովի ծիրէն ներս որպէս բանախօս մասնակցած է «Ձեւաւորելով ժողովրդավարութեան ապագան» խորագրով քննարկումին:
Քննարկումին որպէս բանախօս հանդէս եկած են նաեւ Գոլոմպիայի նախագահ Իվան Տուգէ Մարգեսը, Նեփալի վարչապետ Շարմա Օլին, «The Financial Times» ամսագիրի փոխխմբագիր եւ գլխաւոր տնտեսական մեկնաբան Մարթին Ուոլֆը, «New York Times»-ի հրատարակիչ Արթուր Կրեկ Զալցպըրկըրը եւ «Ղեկավարութիւնը այսօր» նախագիծի գլխաւոր տնօրէն Տանիէլա Պալոու Աարեսը: Քննարկումը վարած է «The Financial Times» ամսագիրի խմբագրի տեղակալ եւ տնտեսական գլխաւոր մեկնաբան Մարթին Ուոլֆը:
ՀՀ կառավարութեան տեղեկատուութեան եւ հասարակայնութեան հետ կապերու վարչութենէն կը տեղեկացնեն, որ ի պատասխան քննարկումը վարող Մարթին Ուոլֆի հարցին` Նիկոլ Փաշինեան նշած է, որ Հայաստանի մէջ մէկ ամիս առաջ տեղի ունեցած են խորհրդարանական ընտրութիւններ, որոնք գնահատուած են ազատ, ժողովրդավարական եւ թափանցիկ։ «Եւ հիմա մենք մեծ յաջողութիւն ենք գրանցել ժողովրդավարութեան հարցում, բայց մենք նաեւ մեծ մարտահրաւէրներ ունենք, ու ամենամեծ մարտահրաւէրը մեր ժողովրդավարութիւնը տնտեսապէս ամրապնդելն է։ Գիտէք, որ մենք երկար ժամանակ մեծ խնդիր ունէինք՝ կապուած ընտակաշառքի հետ։ Երբ մարդիկ իրենց աղքատութեան պատճառով ստիպուած էին ընտրակաշառք վերցնել։ Ի հարկէ, յեղափոխութիւնը մարդկանց ազատեց այդ պարտաւորութիւնից։ Բայց հիմա մենք պէտք է մեր քաղաքացիներին աւելի ուժեղ եւ անկախ դարձնենք տնտեսական առումով։ Գիտէք, որ կայ փոքր, միջին պիզնես, բայց մենք պատրաստուում ենք ստեղծել նոր կատեգորիա, ինչպիսին միկրոպիզնեսն է եւ ազատել նրանց հարկերից՝ յոյսով, որ կը կարողանանք խրախուսել մեր ժողովրդին, բացատրել մարդկանց, որ ոչ միայն կառավարութիւնն է պատասխանատու աղքատութեան յաղթահարման համար, այլ նաեւ իրենք պէտք է ինչ-որ բան անեն։ Մենք ցանկանում ենք խրախուսել մեր ժողովրդին, բայց, ի հարկէ, նաեւ ստեղծել իրական հնարաւորութիւններ՝ պայքարելու սեփական աղքատութեան դէմ։ Այսպիսով, իմ պատասխանն է, որ մեր գլխաւոր մարտահրաւէրը մեր ժողովրդավարութիւնը տնտեսապէս ամրակայելն է, եւ մենք յոյս ունենք ներգրաւել նոր օտարերկրեայ ներդրումներ, որովհետեւ մենք կարողացանք պայքարել կոռուպցիայի դէմ, կարողացանք հիմնել իրական օրէնքի պահանջներ, եւ մենք պատրաստուում ենք պարբերաբար պարզեցումներ կատարել աւելի շատ ներդրումներ գրաւելու նպատակով»,- նշած է Նիկոլ Փաշինեան։
Անդրադառնալով Հայաստանի մէջ լրատուամիջոցներու գործունէութեան ու մամուլի ազատութեան` Նիկոլ Փաշինեան նշած է. «Գիտէ՞ք, ես իրականում լրագրող եմ, գլխաւոր խմբագիր եւ նախկին քաղբանտարկեալ։ Բայց հիմա կարող եմ ասել, որ Հայաստանում լրատուութիւնն այժմ ազատ է, քան երբեւէ։ Բայց ոչ բոլոր լրագրողներն են համաձայն ինձ հետ, որովհետեւ կարծում են, որ չափազանցութիւն է այն միտքը, որ Հայաստանում լրատուութիւնը լիովին ազատ է, բայց ես կարող եմ պնդել դա։ Եւ գիտէք՝ ես կարծում եմ նորմալ է, որ լրատուամիջոցների եւ կառավարութեան կապը պէտք է որոշակիօրէն լարուած լինի, որովհետեւ տեսնում ենք, որ այժմ ամբողջ աշխարհում ցածր վստահութիւն կայ կառավարութեան կարողութիւնների հանդէպ, եւ դա կարող է կապուած լինել այն հանգամանքի հետ, որ այժմ հասարակութեան բոլոր անդամներն աւելի շատ բան գիտեն բարձրաստիճան պաշտօնեաների մասին, քան նախկինում։ Որովհետեւ ամէն մանրուք կարող է ազդել մարդկանց հաւատի վրայ՝ քաղաքական գործիչների, նախարարների հանդէպ եւ այլն, եւ այլն»: Նիկոլ Փաշինեան համոզում յայտնած է, որ միայն կառավարութիւններու լիակատար թափանցիկութիւնը կը բարձրացնէ կառավարութեան նկատմամբ վստահութեան մակարդակը:
Նիկոլ Փաշինեան խօսած է նաեւ ժամանակակից աշխարհին մէջ ընկերային լրատուադաշտի դերին մասին. «Իրականում մենք մեր յեղափոխութիւնը սոցիալական մետիայի միջոցով իրականացրինք, որովհետեւ մենք մետիա շրջափակման մէջ էինք եւ կարողացանք բեկում մտցնել սոցիալական մետիայի կիրառմամբ։ Այժմ ես շարունակում եմ ունենալ ուղիղ հեռարձակումներ իմ ֆէյսպուքեան էջով: Ինչ վերաբերում է մետիայի եւ ազատ, անաչառ ընտրութիւնների կապին, պէտք է ստուգել, թէ ինչ գործօններ են ազդել ընտրութիւնների արդիւնքների վրայ, քանի որ մէկ կամ երկու կեղծ նիւթերի թողարկումը կարող է ազդել ընտրութիւնների արդիւնքների վրայ, ինչը, ի հարկէ, արդէն մեծ խնդիր է։ Բայց ի՞նչ կարելի է անել այս դէպքում, դա մեծ հարց է: Ես հպարտ եմ նշելու, որ մեր երկիրը ճանաչուել է ազատ համացանցի երկիր, այդ ազատութիւնը բերում է նորութիւնների փոխանակման հնարաւորութիւններ կամ թափանցիկութիւն: Ի հարկէ, այն բացում է նաեւ հսկայական դաշտ սխալ, կեղծ նորութիւնների համար, որն, ի հարկէ, ազդում է մեր երկրի իրականութեան ներկայացման վրայ ամբողջ աշխարհում։ Ես անկեղծ կը լինեմ՝ չգիտեմ ինչ անել այս իրավիճակում։ Եթէ որեւէ մէկը գիտի, ապա դա բոլորիս համար ուրախալի է»։
