Հինգշաբթի, 25. 07. 2024

spot_img

Ամենայն Հայոց Կաթողիկոսը Համայն Հայութեանը Յղեց Տիրոջ Ս. Ծննդեան Եւ Աստուածյայտնութեան Աւետիսը 2019 Թուականը Հռչակուեց Ընտանիքի Տարի (լուսանկարներ)

Յունուարի 6-ին մեր Տէր Յիսուս Քրիստոսի Սուրբծննդեան եւ Աստուածայայտնութեան տօնի առիթով Ն.Ս.Օ.Տ.Տ. Գարեգին Երկրորդ ծայրագոյն պատրիարք եւ Ամենայն հայոց կաթողիկոսը Սուրբ Պատարագ մատուցեց Երեւանի Սուրբ Գրիգոր Լուսաւորիչ մայր եկեղեցում:

Սուրբ Պատարագի արարողութեանը ներկայ էին ՀՀ վարչապետի պաշտօնակատար Նիկոլ Փաշինեանը, Սահմանադրական դատարանի նախագահ Հրայր Թովմասեանը, պետական այրեր, ինչպէս նաեւ Մայր Աթոռ Ս. Էջմիածնի միաբաններ, Գերագոյն հոգեւոր խորհրդի անդամներ, Հայ Եկեղեցու բարերարներ, Հայաստանում հաւատարմագրուած օտարերկրեայ դիւանագիտական առաքելութիւնների ղեկավարներ, հասարակական գործիչներ, կրթական, գիտական եւ մշակութային հաստատութիւնների ներկայացուցիչներ, տարբեր համայնքներից ժամանած հարիւրաւոր ուխտաւորներ:

Հայրապետական խաչվառազարդ թափօրը «Խորհուրդ խորին» շարականի հանդիսաւոր երգեցողութեան ներքոյ Սուրբ Տրդատի մատուռից ուղղուեց դէպի ամպհովանու ներքոյ ամփոփուած հայոց հաւատի հայր Ս. Գրիգոր Լուսաւորչի մասունքները, որտեղ կատարուած երկրպագութիւնից յետոյ իր հայրական օրհնութիւնը ժողովրդին բաշխող Ամենայն հայոց կաթողիկոսին առաջնորդեց դէպի խորան:

Սուրբ Պատարագին որպէս առընթերականեր սպասաւորում էին Մայր Աթոռի լուսարարապետ Գերաշնորհ Տ. Յովնան եպիսկոպոս Յակոբեանն ու Մայր Աթոռի Վարչատնտեսական բաժնի տնօրէն Գերաշնորհ Տ. Մուշեղ եպիսկոպոս Բաբայեանը։

Արարողութեան ընթացքում Նորին Սրբութիւն Գարեգին Երկրորդ Ամենայն հայյոց կաթողիկոսը «Քրիստոս ծնաւ եւ յայտնեցաւ» կենդանարար աւետիսը յղեց համայն հայութեանը եւ տօնի առիթով փոխանցեց իր պատգամը:

Ն. Ս. Օ. Տ. Տ. ԳԱՐԵԳԻՆ Բ. ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՊԱՏԳԱՄԸ

ՄԵՐ ՏԷՐ ՅԻՍՈՒՍ ՔՐԻՍՏՈՍԻ

ՍՈՒՐԲԾՆՆԴԵԱՆ ԵՒ ԱՍՏՈՒԱԾԱՅԱՅՏՆՈՒԹԵԱՆ ՏՕՆԻ ԱՌԻԹՈՎ

 

 

Յանուն Հօր եւ Որդւոյ եւ Հոգւոյն Սրբոյ. ամէն:

 

Փառք հրաշափառ Ծննդեան եւ

Յայտնութեան Քո, Տէր:

 

 

Սիրելի բարեպաշտ ժողովուրդ,

Այսօր ունկնդիր ենք Քրիստոսի Սուրբծննդեան աւետիսին եւ խնդութեամբ օրհնաբանում ենք Աստծուն փրկութեան Իր շնորհի համար: Նրան ենք փառաբանում, ասում է առաքեալը, «ով կարող է մեզ պահել անբիծ ու անարատ եւ կանգնեցնել Իր փառքի առաջ անխառն ցնծութեամբ» (Յուդա 24):

Մսուրում ծնուած եւ աշխարհ եկած Մանկան մասին հրեշտակն աւետում է. «Այսօր Դաւթի քաղաքում ձեզ համար ծնուեց մի Փրկիչ, որ Օծեալ Տէրն է» (Ղուկ. Բ 11): Քրիստոս ծնուեց Աստուծոյ երկիւղով լեցուն, երկնային առաքինութիւններով զարդարուած Սուրբ Կոյսից: Աստուծոյ Որդին հասակ առաւ բարեպաշտ ընտանեկան յարկում Սուրբ Տիրամօր եւ Սուրբ Յովսէփի, ովքեր ամէն նեղութեան ու հալածանքի համբերեցին, հոգ տարան Մանուկ Յիսուսին՝ իրենց հաւատաւոր կեանքով դառնալով Նրա աստուածային առաքելութեան մասնակիցը:

Սուրբծննդեան հրաշազարդ պատկերի մէջ, սիրելիներ, տեսնում ենք, որ փրկութեան ուղին սկիզբ առաւ ընտանիքից: Ընտանիքից ծագեց մարդկանց երկնային արքայութեան ժառանգորդը դարձնելու լուսեղէն ճանապարհը: Քրիստոսով, արդարեւ, մենք որդեգիրներն ենք Աստուծոյ: Քրիստոսով մեզ Հայր է Արարիչն Աստուած, Ով սիրում է մեզ եւ նորոգում է մեր կեանքը Սուրբծննդեան յուսառատ ու օրհնաբեր ուրախութեամբ: Փրկչի  Ծննդեան աւետիսը ոռոգում է մեր հոգիները, լիացնում մեր հոգեւոր ապրումներն ու զգացումները, պարգեւում է ուժ ու զօրութիւն աստուածային կամքի մէջ մնալու, մեր կեանքում ու գործերում զօրացնելու խաղաղութեան, արդարութեան, սիրոյ, համերաշխութեան ուղիները եւ մշտահունչ պահելու առ Աստուած փառաբանութիւնը. «Փառք հրաշափառ Ծննդեան եւ Յայտնութեան Քո, Տէր»:

Սուրբծննդեան հոգեպարար զգացումների մէջ, սիրելի բարեպաշտ ժողովուրդ, մեր աղօթական մտքերն ուղղուած են նաեւ աշխարհի մեծ ընտանիքի հաւատակից մեր այն քոյրերն ու եղբայրները, ովքեր նուիրական այս տօնը դիմաւորում են վշտի ու նեղութիւնների մէջ: Մեր մտածումներն ուղղուած են այնտեղ, որտեղ մարդկութեան կեանքը տեւականօրէն ալեկոծում են անարդարութիւնը, գերիշխելու անյագուրդ տենչը, ագահութիւնը, որտեղ մարդիկ շարունակում են կրել աղքատութեան, իրաւունքների ոտնահարման, պատերազմների առաջ բերած աւերներն ու ցաւերը, որտեղ բռնութիւնը բռնութիւն է ծնում, ատելութիւնը՝ ատելութիւն, խաբէութիւնն ու սուտը բազմապատկուում են նոր կեղծիքներով: Այս չարիքները, լինեն դրանք միջանձնային յարաբերութիւններում, ընտանիքներում, թէ ազգերի ու պետութիւնների միջեւ, տանում են դէպի փակուղիներ ու ճգնաժամեր, որոնց յաղթահարման համար շարունակ մեծ ջանք ու ճիգեր են պահանջուում: Փակուղիների են տանում նաեւ կեղծ ազատականութեան աստուածամարտ ընթացքները՝ հեռացնելով տէրունապատուէր կեանքից, հոգեւորից, խաթարելով հիմերը առողջ հասարակութեան եւ ամուր ընտանիքի: Քրիստոսի պարգեւած փրկութեան աստուածապատուէր ուղիներով է, որ մարդկութիւնը պիտի կարողանայ Երկիր մոլորակի վրայ լինել ու մնալ որպէս մեծ ընտանիք՝ փոխադարձ սիրով ու օգնութեամբ ամոքելով իր վէրքերը, հոգալով կարիքները, կարգաւորելով այս աշխարհի խնդիրները եւ ծառայելով «յերկիր խաղաղութիւն, ի մարդիկ հաճութիւն» հրեշտակաձայն պատգամին, որը հնչեց շնորհաբեր ժամին Քրիստոսի Սուրբծնննդեան:

Մեր պատմութեան օրհնեալ ժամանակաշրջանում մեր ժողովուրդը Քրիստոսով դարձել է հաւատաւոր մէկ ընտանիք՝ լուսաւորուելով Տիրոջ կենարար շնորհներով: Առ Տէրը հաւատարիմ ընթացքը բարեպաշտ մեր նախնեաց, մենք, որպէս նրանց հարազատ զաւակները, պիտի շարունակենք պահպանել անսասան հաւատով եւ ապրել ու գործել առաջընթացի վճռականութեամբ: Այսօր մեր կեանքի նոր փոփոխութիւններում թեւածում են յոյսն ու լաւատեսութիւնը՝ նորանոր ձեռքբերումներ արձանագրելու, յաջողութիւններ ու յաղթանակներ կերտելու: Միմեանց ապաւինելով ու սատարելով ի զօրու ենք շէնացնել մեր կեանքը հայրենիքում ու սփիւռքում, պաշտպանել մեր սահմանները, ազգային արդար իրաւունքները, հզօրացնել Հայաստան ու Արցախ հայրենի մեր երկիրը: Հայրենիքի արժանաւոր զաւակ դաստիարակելու, պետութեան քաղաքացի կրթելու առաջին հանգրուանը ընտանիքն է: Ընտանիքում է կերտուում ազգի ապագան, դրուում հիմերը հզօր պետութեան: Ընտանիքի գորովաշատ միջավայրում են մանուկ հոգիներում պտղաբերում Աստուծոյ խօսքի սերմանուած հունդերը, սնուցուում հոգեւոր-բարոյական արժէքները, բարին ընտրելու աներկիւղ ոգին: Ընտանիքում մատուցուած օրինակով կրթուում են միմեանց հանդէպ սէրը, վստահութիւնը եւ հոգատարութիւնը: Արդ, նախանձախնդիր մնանք նուիրականութեանն ու ամրութեանը ընտանիքի: Անխաթար պահպանենք աստուածահաստատ ընտանիք հասկացութիւնը, նրա սրբութիւնը, ազգային աւանդոյթները, խնամենք ու բարձրացնենք մեր հոգեւոր ու ազգային կեանքը եւ մնանք մշտապէս Տիրոջ որդեգրութեան շնորհի մէջ՝ որպէս հաւատաւոր մէկ ընտանիք, որպէս Աստուծոյ սեփական ժողովուրդ:

Աստուածօրհնեալ ընտանիքի արժէքը եւ հիմնարար առաքելութիւնը կարեւորելով ազգային, պետական ու հասարակական մեր կեանքում՝ 2019 թուականը հռչակում ենք ընտանիքի տարի: Յորդորում ենք եկեղեցական և թեմական մեր կառոյցներին եւ հոգեւոր սպասաւորներին նախաձեռնել ընտանիքներին ուղղուած աջակցութեան ծրագրեր ու միջոցառումներ, կազմակերպել ուխտագնացութիւններ մայր հայրենիք, Սուրբ Էջմիածին, Տէրունական եւ հայրենական սրբավայրեր՝ զօրանալու հաւատքով, տոգորուելու հայրենեաց սիրոյ ջերմութեամբ եւ ազգի ու հայրենիքի զաւակը լինելու նուիրական գիտակցութեամբ:

Սուրբծննդեան բերկրալի աւետիսով եղբայրական Մեր ողջոյնն ենք յղում Առաքելական մեր Սուրբ Եկեղեցու Նուիրապետական Աթոռների Գահակալներին` Ն. Ս. Օ. Տ. Տ. Արամ Ա Մեծի Տանն Կիլիկիոյ Կաթողիկոսին, Երուսաղէմի Հայոց Պատրիարք Ամենապատիւ Տ. Նուրհան արքեպիսկոպոս Մանուկեանին: Աղօթում ենք հիւանդութեան մահճում գտնուող Ամենապատիւ Տ. Մեսրոպ Արքեպիսկոպոս Մութա‎‎ֆեան Պատրիարքի համար: Փրկչի շնորհների հայցով Մեր ողջոյնն ենք յղում քոյր Եկեղեցիների հոգեւոր պետերին: Հայրապետական օրհնութեամբ ողջունում եւ Մեր բարեմաղթանքներն ենք բերում Սրբազան Պատարագի արարողութեանը ներկայ Հայաստանի Հանրապետութեան Վարչապետի պաշտօնակատար տիար Նիկոլ Փաշինեանին եւ նրա ազնիւ տիկնոջը: Ողջոյն ենք յղում Հայաստանի Հանրապետութեան նախագահ տիար Արմէն Սարգսեանին, Արցախի Հանրապետութեան նախագահ տիար Բակօ Սահակեանին, հայոց պետական աւագանուն, Հայաստանում հաւատարմագրուած դիւանագիտական առաքելութիւնների ներկայացուցիչներին: Հայրապետական Մեր սէրը, օրհնութիւնն ու բարեմաղթանքները՝ մեր Սուրբ Եկեղեցու հոգեւոր դասին եւ համայն հաւատաւոր Մեր ժողովրդին:

Սուրբծննդեան  հոգենորոգ այս օրը աղօթում եւ հայցում ենք, որ աշխարհում  բազմապատկուեն երկնային շնորհները, մարդիկ առատութեամբ պտղաբերեն բարի գործեր, սէր, արդարութիւն, խաղաղութիւն, գութ ու ողորմածութիւն, որոնք դիմադարձում են չարիքներին եւ ճանապարհ հարթում դէպի լուսաւոր գալիքը մարդկութեան: Աղօթքով առ Աստուած հայցում ենք, որ Իր ամենախնամ հոգածութեան եւ սիրոյ մէջ պահի մեր ժողովրդին եւ պարգեւի ուժ ու զօրութիւն՝ կերտելու նոր օրը իր կեանքի եւ մնալու օրհնեալ, նուիրեալ ընտանիքը Քրիստոսի` հաւատարիմ սրտով միշտ փառաբանելու. «Փառք հրաշափառ Ծննդեան եւ Յայտնութեան Քո, Տէր»:

Գոհաբանական այս զգացումով աշխարհասփիւռ հաւատաւոր մեր ժողովրդին ցնծութեամբ աւետում ենք՝

 

Քրիստոս ծնաւ եւ յայտնեցաւ,

Ձեզ եւ մեզ մեծ աւետիս:

 

Ս. Պատարագի աւարտին տեղի ունեցաւ Ջրօրհնէքի արարողութիւնը: Սուրբգրային ընթերցումներից, ջրօրհնեաց շարականների երգեցողութիւնից եւ աղօթասացութիւնից յետոյ Ամենայն Հայոց Կաթողիկոսը խաչով եւ Սրբալոյս Միւռոնով օրհնեց ջուրը: Օրհնութիւնից յետոյ սուրբ խաչը փոխանցուեց խաչի այս տարուայ կնքահօրը` ՀԲԸՄ Կենտրոնական խորհրդի անդամ, ՀԲԸՄ-Հայաստանի նախագահ Վազգէն Յակոբեանին:

Վերջում Ամենայն Հայոց Կաթողիկոսը վերստին իր օրհնութիւնն ու Սուրբծննդեան բարեմաղթանքները փոխանցեց ներկայ բարեպաշտ ժողովրդին, որից յետոյ օրհնուած ջուրը բաշխուեց հաւատացեալներին:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին