Շաբաթ, 13. 07. 2024

spot_img

Մայր Աթոռ Սուրբ Էջմիածնում Սկսուեց «Եկեղեցին Փոփոխուող Աշխարհում. Մարտահրաւէրներ Եւ Հեռանկարներ» Խորագրով Կոնֆերանսը (լուսանկարներ)

Նոյեմբերի 23ին Ն.Ս.Օ.Տ.Տ. Գարեգին Երկրորդ ծայրագոյն պատրիարք եւ Ամենայն հայոց կաթողիկոսի օրհնութեամբ Մայր Աթոռ Ս. Էջմիածնի «Գարեգին Ա» կրթական կենտրոնում մեկնարկեց «Եկեղեցին փոփոխուող աշխարհում. մարտահրաւէրներ եւ հեռանկարներ» խորագրով եռօրեայ կոնֆերանսը` կազմակերպուած «Տիալոկ» հասարակական կազմակերպութեան գործակցութեամբ:

Գիտաժողովը սկսուեց տէրունական աղօթքով, որից յետոյ կոնֆերանսին մասնակից եկեղեցականներին եւ աշխարհականներին ողջունեց Մայր Աթոռի Արտաքին յարաբերութիւնների եւ արարողակարգի բաժնի տնօրէն Գերաշնորհ տ. Նաթան արքեպիսկոպոս Յովհաննիսեանը:

Սրբազան հայրը ներկաներին յղեց Ամենայն հայոց կաթողիկոսի հայրական օրհնութիւնները՝ բարի ընթացք մաղթելով կոնֆերանսի աշխատանքներին:

Նաթան արքեպիսկոպոսն ընդգծեց, որ քննարկուելիք թեմաներն ու խնդիրները քրիստոնէութեան առաջին իսկ օրերից եղել են եւ մշտապէս յուզել մարդ արարածին:

«Մեր օրերում եւս այդ խնդիրները մենք համարում ենք շատ արդիական, որովհետեւ ընդհանուր աշխարհի մէջ քրիստոնէական արժէքների պահպանումն աւելի ու աւելի դժուար է դառնում:

Ըստ իս՝ առաջին եւ ամենակարեւոր պայմանն այն է, որ քրիստոնէական բարոյականութիւնը կարող է կեանքի կոչուել եւ մեր ամէնօրեայ կեանքի մաս լինել միայն այն ժամանակ, երբ մենք այն ընդունում ենք ոչ թէ իբրեւ օրէնք, բարոյական նորմ կամ կանոն, այլ մեր քրիստոնէական հաւատքի վրայ հիմնուած կենսակերպ: Մենք բոլորս, առաջին հերթին, հենց սա պէտք է ի մտի ունենանք. առանց հաւատքի որեւէ քրիստոնէական արժէք վերածուում է տեսական մի օրէնքի»,- նշեց Նաթան սրբազանը՝ յորդորելով բոլոր մտորումների եւ քննարկումների մէջ առաջնայնութիւնը տալ հաւատքին, որի միջոցով միայն հնարաւոր կը լինի հասնել վերջնանպատակին:

Սրբազանը համաժողովի մասնակիցներին պատգամեց իրենց հաւաքներում առաջնորդուել քրիստոնէական հաւատքի զօրութեամբ, Սուրբ Հոգու քաջալերութեամբ եւ Քրիստոսի պարգեւած խաղաղութեամբ:

Ներկաներին ողջունեց նաեւ «Տիալոկ» հասարակական կազմակերպութեան նախագահ Ալմաստ Մուրադեանը:

Այնուհետեւ հոգեւոր երգերի կատարմամբ հանդէս եկաւ Արագածոտնի թեմի Ապարանի Ս. Խաչ եկեղեցու երգչախումբը:

Եռօրեայ կոնֆերանսի ընթացքում կը ներկայացուեն զեկոյցներ «Ժամանակակից աշխարհը եւ հակաքրիստոնէութեան դրսեւորումները», «Աշխարհիկացումը եւ բարոյականութեան հիմնախնդիրները 21րդ դարում», «Քրիստոնէական արժեհամակարգի դիտարկումը միջանձնային փոխյարաբերութիւնների կառուցուածքում», «Բարոյականութեան արժէքները Հայ առաքելական եկեղեցու դիրքորոշման կոնտեքստում»,  «Քրիստոնէական ընտանիքի մոտելը ժամանակակից հասարակութեան կառուցուածքում» եւ այլ թեմաներով:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին