«ԶԱՐԹՕՆՔ», ՊԷՅՐՈՒԹ – ԱՄՆի նախագահ Տոնալտ Թրամփ Գոհաբանութեան օրը ընթրիքը անցուցած է ընտանեկան միջավայրի մէջ: Այդ մասին, ինչպէս կը փոխանցէ «Արմէնփրես»ը, Նոյեմբեր 23ին յայտնած են Միացեալ Նահանգներու զանգուածային լրատուամիջոցները:
Ընթրիքին ներկայ եղած են իր տիկինը՝ Մելանիան, որդին՝ Պարրոնը, եւ դուստրերը՝ Իվանքան ու Թիֆանին:
Նախագահի խնդրանքով՝ լրագրողներու համար, որոնք կարճ ժամանակով հրաւիրուած էին ընթրիքի սրահը, նուագած են «Music of the Night» ստեղծագործութիւնը: Ընթրիքին մատուցած են Գոհաբանութեան օրուան համար աւանդական հնդկահաւ, ինչպէս նաեւ գառ, տաւարի միս եւ մի քանի տեսակի ձկներ: Որպէս խաւարտ՝ հիւրերուն առաջարկած են գետնախնձորի խիւս, քաղցր գետնախնձոր եւ բանջարեղէն, հաղորդած է «Ինթերֆաքս»ը:
