ՌԱԿ Լիբանանի Շրջանային նորընտիր Վարչութիւնը իր ծանօթացման հանդիպումներու ծիրէն ներս երէկ՝ 16 Նոյեմբեր 2018ի յետմիջօրէին, պատուիրակութեամբ մը այցելութիւն տուաւ Տանն Կիլիկիոյ Կաթողիկէ Հայոց Գրիգոր Պետրոս Ի.Կաթողիկոս-Պատրիարքին: Հանդիպման ներկայ էին Գերապայծառ Տ. Գէորգ Եպս. Ասատուրեանն ու Գերապատիւ Հայր Սեպուհ Վրդ. Կարապետեանը:
Հանդիպումը առիթ մըն էր հոգեւոր տիրոջ հետ քննարկելու Լիբանանն ու Հայ ժողովուրդը յուզող հարցեր:
Հոգեւոր տէրը յատուկ ուշադրութեամբ մատնանշեց մարդոց մօտ հաւատքի պակասի երեւոյթին մասին, որ մայրն է ամէն չարիքի: Ան նաեւ մտահոգութեամբ անդրադարձաւ Լիբանանահայ դպրոցի իրավիճակին մասին:
Հոգեւոր տէրը իմացած ըլլալով ՌԱԿի ղեկավար ընկերներէն՝ Հրայր Հովիւեանի մահուան մասին, ՌԱԿ Լիբանանի Շրջանային Վարչութեան պատուիրակութեան միջոցով ցաւակցեցաւ հանգուցեալին ընտանիքին եւ գաղափարի բոլոր ընկերներուն:
Աւարտին, Արժանապատիւ Տ. Գրիգոր-Պետրոս Կաթողիկոս-Պատրիարքը յաջողութիւն եւ բարի երթ մաղթեց ՌԱԿի նորընտիր վարչութեան:
Տեղեկատուական Գրասենեակ
