Շաբաթ, 13. 07. 2024

spot_img

Կիւմրիի Մէջ Տեղի Ունեցաւ Եուրի Վարդանեանի Հոգեհանգիստի Արարողութիւն. (լուսանկարներ)

«Զարթօնք» Հայրենիքի Մէջ – 7 – 

ՔՐԻՍԹԻՆԱ ԱՂԱԼԱՐԵԱՆ

«Զարթօնք»ի Երեւանի Աշխատակից

Երէկ Կիւմրիի Սուրբ Յակոբ եկեղեցւոյ մէջ տեղի ունեցաւ հայ աշխարհահռչակ ծանրորդ, ողիմպիական եւ աշխարհի, Եւրոպայի ախոյեան, Վրաստանի մէջ ՀՀ արտակարգ եւ լիազօր դեսպան Եուրի Վարդանեանի յուղարկաւորութեան արարողութիւնը: Արարողութեան ներկայ էին Կիւմրիի քաղաքապետ Սամուէլ Բալասանեանը, Շիրակի մարզպետ Կարէն Սարուխանեանը, Եուրի Վարդանեանի ընկեր Վարդեւան Գրիգորեանը, հարազատները եւ կիւմրեցիներ, որոնք բարձր կը գնահատեն Վարդանեանի աւանդը։

Նշենք, որ այսօր Երեւանի մէջ եւս տեղի պիտի ունենայ հոգեհանգիստի արարողութիւն:

Եուրի Վարդանեան ծնած է 1956 թուականի Յունիս 13ին Լենինական։ 1977 թուականին ստացած է ԽՍՀՄ մարմնակրթութեան վաստակաւոր վարպետի կոչում։ 1980 թուականին դարձած է ողիմպիական խաղերու ախոյեան։ 1978-1981 թուականներուն ճանչցուած է աշխարհի լաւագոյն ծանրորդը։ Սահմանած է աշխարհի 43 մրցանիշ։ 1980 թուականին միջին քաշի կարգով երկամարտի ցուցանիշը առաջինը հասցուցած է 400 քկ-ի։ 1980 թուականին Մոսկովեան ողիմպիականին արժանացած է «ոսկէ քիլոկրամներ» մրցանակին (անձնական քաշէն առաւելագոյն ծանրութիւն յաղթահարելու համար): 1985 թուականին տարբեր մրցումներու նուաճած է 111 ոսկէ մետալ։ 1991 թուականին մեկնած է ԱՄՆ, ուր բնակութիւն հաստատած է։ 2009 թուականին նշանակուած է Հայաստանի Հանրապետութեան նախագահի խորհրդական, ապա եղած է ՀՀ մարմնակրթութեան եւ երիտասարդութեան հարցերու նախարար, իսկ 2014 թուականին նշանակուած է Վրաստանի մէջ Հայաստանի Հանրապետութեան արտակարգ եւ լիազօր դեսպան:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին