Շաբաթ, 20. 07. 2024

spot_img

«Զարթօնք» Հայրենիքի Մէջ – 7 – ՀՀ Անվտանգութեան Գործին Մէջ Եւ Նոր Թէ Հին Հայաստանի Մէջ Այդ Հարցին Վերաբերեալ Տեսակէտները Չեն Փոխուած

Պաշտպանութեան Նախարարի Պաշտօնակատար Դաւիթ Տօնոյեանը Հարցազրոյց Տուաւ: Ան Խօսեցաւ Շարք Մը Կարեւոր Հարցերու Մասին

ՔՐԻՍԹԻՆԱ ԱՂԱԼԱՐԵԱՆ

«Զարթօնք»ի Երեւանի Աշխատակից

Երէկ՝ Նոյեմբեր 12ին պաշտպանութեան նախարարութեան մէջ տեղի  ունեցաւ նախարարի պաշտօնակատար Դաւիթ Տօնոյեանի մամուլի ասուլիսը, որուն ժամանակ նախարարը խօսեցաւ հայ-ռուսական ռազմական համագործակցութեան, ռուսական կողմի հետ զէնք գնելու պայմանագիրերուն, ՀԱՊԿի մէջ գլխաւոր քարտուղարի պաշտօնին Հայաստանի ներկայացուցիչ չընտրուելուն, հայ-ազրպէյճանական սահմանին տիրող իրավիճակին, Ազրպէյճան-Հայաստան ռազմական կապի հնարաւորութեան եւ այլ հարցերու մասին:

Մինչեւ ասուլիսի մանրամասնութիւնները ներկայացնելը, նշենք, որ ՀՀ պաշտպանութեան նախարարութիւնը «Armenian Army» անունով համազգեստներ կը ստեղծէ: Տարբեր երկիրներու զինուած ուժեր ունին իրենց տարբերանշանը, սա ալ կ’ըլլայ Հայաստանի զինուած ուժերունը:

Սահմանային իրավիճակ՝ Արցախ եւ Հայաստան

Նախօրէին մամուլի մէջ տեղեկութիւններ հրապարակուեցան, որ ազրպէյճանական կողմը Հայաստանի հետ սահմանին Նախիջեւանի հատուածին մէջ դիրքերը յառաջ տուած է, այդպիսով թիրախի տակ առնելով հայկական գիւղերը: Նախարարի պաշտօնակատար Տօնոյեանը այդ առնչութեամբ նշեց, որ Նախիջեւանի հատուածին մէջ Ազրպէյճանի զինուած ուժերը տարածքներ չեն գրաւած, դիրքերը յառաջ չեն տուած: Տօնոյեանի խօսքով՝ այդ մէկը ընդամէնը եղած է միջդիրքային տարածք, ինչ որ որոշ չափով կրճատուած է եւ անցեալին այդ տարածքին ՀՀ զինուած ուժերը որեւէ վերահսկողութիւն չեն իրականացուցած:

Այն հարցին, թէ հայկական կողմը ազրպէյճանական այդ քայլին պատասխան տուած է, նախարարի պաշտօնակատարը ըսաւ՝ այո՛, հայկական կողմը պատասխանած է՝ այս մասին որեւէ մանրամասնութիւն չտալով: «Պաշտօնապէս կը յայտարարեմ՝ Նախիջեւանի մէջ ազրպէյճանական ԶՈՒերը որեւէ տարածք չեն գրաւած»,- ըսած է նախարարը:

Սահմանային իրավիճակի կապակցութեամբ թէ՛ Հայաստանի, թէ՛ Արցախի մէջ, Դաւիթ Տօնոյեանի խօսքով, վերահսկելի է, հայկական զինուած ուժերը մեծ պատասխանատուութեամբ կը կատարեն իրենց առջեւ դրուած խնդիրները:

Հայռուսական ռազմական համագործակցութիւն եւ ՀԱՊԿ

Պաշտպանութեան նախարարի պաշտօնակատար Դաւիթ Տօնոյեանը նախ եւ առաջ տեղեկացուց, որ ռուսական կողմի հետ 100 մլն վարկի ծիրին մէջ սպառազինութեան մատակարարման վերաբերեալ պայմանագիրերը կնքուած են, սակայն բանակցութիւնները դեռեւս չեն աւարտած:  Իսկ մատակարարուող զէնք-զինամթերքի մէկ մասը արդէն արտադրուած է:

Ի դէպ, նշենք, որ հայկական արտադրութեան անօդաչու թռչող սարքերը եւս ներառուած են ՀՀ ԶՈւ սպառազինութեան մէջ: Տօնոյեանը յայտարարեց, որ հայկական սպառազինութեան մէջ նորարարութիւններ ալ կան, որոնք ստեղծման փուլի մէջ են:

Անդրադառնալով լրագրողներու հարցերուն՝ կապուած ՌԴ սահմանապահ զօրքի՝ Հայաստանի մէջ ըլլալ-չըլլալու մասին, Դաւիթ Տօնոյեանը վերահաստատեց, որ ՌԴ Զինուած ուժերն ու սահմանապահները կարեւոր դերակատարում կ’իրականացնեն ՀՀ անվտանգութեան գործին մէջ եւ նոր թէ հին Հայաստանի մէջ այդ հարցին վերաբերեալ տեսակէտները չեն փոխուած:

Ռազմական կապ Հայաստանի ու Ազրպէյճանի միջեւ

Երէկ լրագրողներու հետ հանդիպման ժամանակ ՀՀ Պաշտպանութեան նախարարի պաշտօնակատար Դաւիթ Տօնոյեանը տեղեկացուց, որ Հայաստանի ու Ազրպէյճանի միջեւ ռազմական հաւանական կապի համար նախատեսուած են յատուկ պաշտօնեաներ, որոնք կ’ապահովեն այդ կապը:

Նախարարի պաշտօնակատարի խօսքով՝ այդ պայմանաւորուածութիւնը, որ ձեռք բերուած է Ասթանայի մայրաքաղաք Տուշամպէի մէջ, մինչեւ այժմ անխափան կը գործէ: Տօնոյեանը նաեւ տեղեկացուց, որ իրենց ԵԱՀԿ Մինսքի խումբի համանախագահներուն մօտ բարձրաձայնած են այն հարցը, որ այդպիսի կապ պէտք է գործէ նաեւ Պաշտպանութեան բանակի յատուկ պաշտօնեաներու հետ եւս:

Խօսելով ՀԱՊԿի մէջ գլխաւոր քարտուղարի Հայաստանի թեկնածուի հաւանութեան չարժանանալու մասին, Դաւիթ Տօնոյեանը շեշտեց, որ տեղի ունեցած են նեղ կազմով քննարկումներ, զորս բարձրաձայնելու ենթակայ չեն: Նախարարի պաշտօնակատարի կարծիքով՝ ՀԱՊԿ յայտարարութիւններու բովանդակութեան վրայ չի կրնար ազդել հանգամանքը, թէ գլխաւոր քարտուղարը ո՛ր երկրի ներկայացուցիչն է: Նախարարի կարծիքով՝ ՀԱՊԿ գլխաւոր քարտուղարի քաղաքացիութիւնը չի կրնար որեւէ կերպ ազդել հայանպաստ յայտարարութիւններու եւ որոշումներու վրայ: Նշենք, որ Դեկտեմբերի վեցին պիտի քննարկուի ՀԱՊԿ անդամ Պելառուսի թեկնածուի հարցը, եւ Տօնոյեանը խորհուրդ տուաւ սպասել մինչեւ այդ օրը:

Միջազգային համագործակցութեան ծիրէն ներս, Տօնոյեանի տեղեկացմամբ, հայ կին խաղաղապաները պիտի գործուղուին Կոսովօ՝ կատարելու խաղաղապահ առաքելութիւն:

Զինծառայողներու խնդիրներ

Լրագրողներու հետ հանդիպման ժամանակ անդրադարձ կատարուեցաւ նաեւ ՀՀ Զինուած ուժերու մէջ ծառայող սպաներու խնդիրներուն: Մասնաւորապէս, ցաւոտ է աշխատավարձի հարցը: Նախարարի պաշտօնակատարի տեղեկացմամբ՝ այս տարի եւս աշխատավարձերու բարձրացում չի նախատեսուիր, չնայած այն հանգամանքին, որ պաշտպանական ոլորտին տրուող պիւտճէն աւելցած է: Դաւիթ Տօնոյեանի խօսքով՝ բարձրացում չի նախատեսուիր, բայց յաւելավճարներ կ’ըլլան, որոնք ժամանակաւորապէս կը լուծեն խնդիրը: Աւելցնենք, որ 1400 զինծառայող ծառայութեան աւարտէն ետք բնակարաններ կը ստանան ՊՆէն: Ծրագիրի իրականացման համար արդէն աշխատանքներ կը տարուին:

Լրագրողներու խնդրանքով՝ Տօնոյեանը մանրամասնութիւններ ներկայացուց նաեւ Նոյեմբեր 7ին Գորիս-Որոտան ճանապարհին տեղի ունեցած ողբերգական վթարի մասին, որուն հետեւանքով չորս զինծառայող զոհուեցաւ, իսկ մօտ քսանը մարմնական տարբեր վնասուածքներով տեղափոխուեցաւ հիւանդանոց: Նախարարը նշեց, որ ատիկա մեծ ողբերգութիւն էր թէ իր, թէ բանակի թէ հրամանատարական կազմի համար: «Նախաքննութիւնը կը պարզէ վթարի պատճառները: Այս պահուն որեւէ բան չեմ կրնար ըսել: Միայն կ’ըսեմ, որ մեքենայի վարորդը լաւագոյններէն մէկը եղած է»,- նշած է նախարարի պաշտօնակատարը եւ աւարտած ասուլիսը:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին