Հինգշաբթի, 25. 07. 2024

spot_img

«Գաւառը» Լուսարձակի Տակ – 3 – Ինչո՞ւ Ժողովուրդը Թիկունք Չկանգնեցաւ Իր Նախագահին

ՎԱՀԱՆ ԱՆՏՈՆԵԱՆ

«Զարթօնք»ի աշխատակից

Տասը տարի որպէս երկրի նախագահ պաշտօնավարելէ, իսկ ատկէ առաջ ալ որպէս վարչապետ աշխատելէ ետք պետութեան առաջին դէմքը անփառունակ վախճան մը ունեցաւ. ժողովուրդը չպաշտպանեց նախագահին, տարիներ շարունակ անոր մատուցած ծառայութիւններուն համար: Ի՞նչն էր պատճառը: Կարելի է ըսել, որ տարիներու ընթացքին ժողովուրդը աստիճանաբար հիասթափուեցաւ ստեղծուած իրավիճակէն, շատեր բռնեցին արտագաղթի ճամբան, ուրիշներ մեկնեցան «խոպան»` երկրին մէջ մնացած իրենց ընտանիքներուն հաց հայթայթելու համար, իսկ մնացողներն ալ կամ փողոցներուն մէջ պտուղ ու բանջարեղէն սկսան ծախել, կամ ալ թաքսի քշել, քանի որ մինչեւ անկախութիւնը աշխատող հիմնարկները  քանդուած ու թալանուած էին: Նոր հիմնարկներ չկառուցուեցան եւ նոր աշխատատեղեր չբացուեցան՝ հակառակ ղեկավարութեան «Առաջ Հայաստան» բացագանչութիւններուն: Փակագիծերու մէջ աւելցնենք, որ «Առաջ Հայաստան» լոզունգը կեղծ դերակատարութիւն մը ունեցաւ Վանաձորի մէջ: Յայտարարուեցաւ, որ Վանաձորի Քիմիական Գործարանը պիտի վերագործարկուի եւ աւելի մանրամասնօրէն նշուեցաւ, թէ ո՛ր բաժանմունքը որ ամսուն պէտք է աշխատի: Վանաձորի բնակչութիւնը ոգեւորուեցաւ. ի վերջոյ այդ գործարանի շնորհիւ էր, որ նախկին գիւղաքաղաքը քաղաք դարձած էր խորհրդային ժամանակաշրջանին: 2008ի նախագահական ընտրութիւնները  հեռու չէին, այդ պատճառով ալ 2007ին սկսան աշխատցնել արհեստական կիսաթանկարժէք քարերու բաժանմունքը: Յայտարարուեցաւ, որ գործարանը նոր սեփականատէր ունի, բայց աշխատողները այդպէս ալ չիմացան, թէ ով է տուեալ սեփականատէրը: 2008ի ընտրութիւնները վերջացան:

Յաջորդեցին նոր տարիներ. ոչ մէկ նոր բաժանմունք աւելցաւ վերը նշուածի վրայ: 2013ի ընտրութիւններու երկրորդ շրջանը հեռու չէր: Եւ յանկարծ յայտարարուեցաւ, որ նոր բաժանմունքներ պէտք է գործարկուին. խիստ թափով բազմաթիւ նոր, մասնագէտ կամ ոչ մասնագէտ, անհրաժեշտ կամ աւելորդ մարդիկ ընդունուեցան աշխատանքի: Մարդիկ կենսուրախ էին, որ վերջապէս վերադարձան աշխատանքի, մաքրեցին, զարդարեցին սենեակներն ու արհեստանոցները իրենց տուներէն նոյնիսկ ծաղիկներ ու ծաղկամաններ բերելով. արտադրական մասերը առանձին-առանձին փորձարկուեցան: Երկրաշարժէն յետոյ անգործութեան մատնուած գործարանը այժմ եռուզեռի մէջ էր:

2013ի նախագահական ընտրութիւնները վերջացան: Ապրիլ ամսին սկսաւ պաշտօնավարութեան երկրորդ շրջանը, եւ… Մայիսին գործարանի աշխատանքները դադրեցան: Աշխատաւորներու մեծ մասը ուղարկեցին տուն, մնացին կիսաթանկարժէք քարերու աշխատողները, որոնք առանց արտադրանք տալու շարունակեցին գործարան յաճախել մինչեւ Նոյեմբեր 1ը: Մարդիկ անմիջապէս արձագանգեցին` «ընտրութիւնները վերջացան, գործարանը այլեւս պէտք չէ»: Այնուհետեւ գործարանը սնանկ յայտարարուեցաւ եւ սկսաւ քանդելու գործողութիւնը:

Ամփոփելու համար տանք մի քանի հարց.

Առաջին հարց. ինչո՞ւ մինչեւ վերջ անյայտ մնաց սեփականատիրոջ անունը. երկրորդ հարց` ի՞նչ սեփականատէր է, որ առանց մասնագէտներու հետ ծախսի եւ եկամուտի մասին նախահաշուարկ կատարելու սկսաւ գործարան աշխատցնել, եւ երրորդ հարցը` ի՞նչպէս եղաւ, որ գործարանի սնանկացած ըլլալը ընտրութիւններէն մէկ ամիս առաջ չպարզուեցաւ, այլ մէկ ամիս ետք:

Նափոլէօն կայսրը ժամանակին ըսեր է. «Ժողովուրդին մէկ անգամ կարելի է խաբել, երկու անգամ կարելի է խաբել, երրորդ անգամ չես կրնար խաբել»:

Ահա թէ ինչու Վանաձորի, և ընդհանրապէս Հայաստանի ժողովուրդը չուզեց լսել նոր սուտեր և նոր ուղի ընտրեց իրեն համար:

 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին