Շաբաթ, 20. 07. 2024

spot_img

ՀԲԸՄ-ի նախագահ Տիար Պերճ Սեդրակեան այցելեց Մանուկեան-Տեմիրճեան վարժարան

ՆՈՐ ՕՐ, ԼՈՍ ԱՆՃԵԼԸՍ.- Հայկական Բարեգործական Ընդհանուր Միութեան նախագահ Տիար Պերճ Սեդրակեան Հինգշաբթի, Հոկտեմբեր 25-ին այցելեց ՀԲԸՄ Մանուկեան-Տեմիրճեան վարժարան, ընկերակցութեամբ ՀԲԸՄ-ի փոխնախագահ Տիար Սինան Սինանեանի, ՀԲԸՄ Կեդրոնական վարչական ժողովի անդամեր Տիկ. Լորի Մունչէրեանի եւ Տիկ. Լենա Սարգիսեանի, նախագահի խորհրդական Արթուն Համալեանի, ՀԲԸՄ ՄՏՎ-ի հոգաբարձական կազմի ատենապետ Տիար Գէորգ Զօրեանի եւ անդամներու, ինչպէս նաեւ Տեմիրճեան բարերար ընտանիքէն՝ Երուանդ Տեմիրճեանի:

ՀԲԸՄ-ի նախագահը դիմաւորուեցաւ վարժարանի տնօրէնութեան եւ Աշակերտական խորհուրդի անդամներու կողմէ: Հիւրերը շրջայց կատարեցին վարժարանի տարբեր բաժիններ եւ դասարաններ: Անոնք ծանօթացան այս տարեշրջանին հիմնովին վերանորոգուած համակարգիչի երկու դասարաններուն, երկրորդականի արդիականացած պարի դասարանին, Նախակրթարանի թուաբանութեան դասարանին ու անոր նորարարութիւններուն: Ամէն տեղ, աշակերտները իրենց ելոյթով թէ անմիջական զրոյցով տպաւորեցին հիւրերը:

Յաջորդ կանգառն էր Արտեմիս Նազարեան Ծաղկոցը, ուր Պրն. Սեդրակեան եւ հիւրերը դիմաւորուեցան ՀԲԸՄ-ի դրօշակներով եւ հայրենաշունչ երգերու փունջով մը:

Երկրորդականի աշակերտութեան հետ զրոյց-հանդիպումը ծրագրուած էր դպրոցին հանդիսասրահին մէջ, ուր Լրագրութեան ակումբի անդամներուն հարցումներուն պատասխանեց Միութեան նախագահը: Ամենատարբեր հարցումներուն ան տուաւ լիարժէք պատասխաններ, խօսելով իր փորձառութեան, մասնագիտութեան, ՀԲԸՄ-ի նախագահի պատասխանատուութեան, հայու ինքնութեան մասին: Աւարտին, փոխանցեց նաեւ իր պատգամը աշակերտութեան, ըլլալու ազնիւ քաղաքացիներ, տիպար հայեր, անպայման ապագային մաս կազմելով հայ համայնքի կազմակերպչական կեանքին:

Տնօրէնուհի Տիկ. Արփի Աւանէսեան դրօշակով մը պատուեց պարոն Սեդրակեանը, որուն վրայ ստորագրած էին անցեալ Մայիսին Հայաստան այցելած եւ Արագածի գագաթը բարձրացած աշակերտներն ու ուսուցիչները:

Օրուան աւարտին, Տնօրէնութիւնը ժողով-հանդիպում ունեցաւ հիւրերուն հետ, ծանօթացնելով վարժարանին արձանագրած յաջողութիւններուն եւ նուաճումներուն:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին