19 Հոկտեմբեր 2018ին Հայ կաթողիկէ Մեսրոպեան բարձրագոյն վարժարանի աշակերտներ միացան աշխարհի չորս ծագերուն սփռուած իրենց մէկ միլիոն հասակակիցներուն՝ աղօթելու համար Տիրամօր Վարդարանը:
Սուրբ Փրկիչ եկեղեցւոյ մէջ կայացած հաւաքին, Մեսրոպեանի հոգեւոր տեսուչ Տէր Ռաֆֆի քհնյ. Յովհաննէսեան կատարեց Վարդարաններու օրհնութիւն եւ բացատրեց զայն աղօթելու կերպը. հաւաքին մասնակցող Գ.-Զ. դասարաններու մօտ 200 աշակերտներէն իւրաքանչիւրը ստացաւ իր Վարդարանը: Անոնք խմբովին կատարեցին աւետարանական այս աղօթքը, որ կը ներկայացնէ Սուրբ Կոյսի կեանքին դրուագները Յիսուսին հետ:
Տէր Ռաֆֆի քահանան աշակերտներուն բացատրեց Վարդարանը աղօթելու կերպը, անոր իմաստն ու խորհուրդները, ինչպէս նաեւ անոր նշանակութիւնը` հաւատացեալ քրիստոնեայի կեանքին մէջ: Ան ըսաւ, որ մշտապէս աղօթելով քրիստոնեայ մարդը ի վիճակի կը դառնայ խորանալու Վարդարանի իւրաքանչիւր խորհուրդին մէջ` հետզհետէ աճող երկիւղածութեամբ եւ ակնածանքով: Քահանայ հայրը դիտել տուաւ, որ Վարդարանը հզօր աղօթք մըն է, որուն ընդմէջէն կը հաղորդուինք Տիրոջ` հաւատքի մեր ամբողջ ճանապարհորդութեան ընթացքին: Ան խորհուրդ տուաւ աղօթել Վարդարանը` ինչպէս անհատապէս, նոյնպէս եւ հաւաքաբար, յատկապէս ընտանիքներուն մէջ:
Տեղեկատուական գրասենեակ
Հայ Կաթողիկէ Մեսրոպեան Բարձրագոյն Վարժարանի
