Հինգշաբթի, 25. 07. 2024

spot_img

Լոնտոնի ԹՄՄը Նշեց Երեւանի Հիմնադրման 2800ամեակին

Լոնտոնի «Քոփթորն Թարա» հիւրանոցին մէջ Լոնտոնի Թէքէեան խնամակալ մարմինի (Tekeyan Trust) եւ Թէքէեան Մշակութային Միութեան կազմակերպութեամբ կայացաւ մեծաշուք հանդիսութիւն՝ նուիրուած Երեւանի հիմնադրման 2800ամեակին: Միջոցառումին ներկայ էին Միացեալ Թագաւորութեան մէջ Հայաստանի դեսպանութեան խորհրդական Տիգրան Գալստեանը, Մեծ Բրիտանիոյ եւ Իռլանտայի հայոց թեմի հայրապետական պատուիրակ եւ առաջնորդ Տ. Յովակիմ եպիսկոպոս Մանուկեանը, Հայր Շնորհք Բագհդասարեանը, հասարակական-քաղաքական, մշակութային գործիչներ, հայ համայնքի բազմաթիւ ներկայացուցիչներ, ինչպէս նաեւ բրիտանացի բարեկամներ:

Ձեռնարկը մեկնարկեց Հայաստանի եւ Երեւան քաղաքի օրհներգերով, որմէ ետք հիւրերը մէկ վայրկեան լռութեամբ յարգեցին աշխարհահռչակ երաժիշտ, շանսոնիէ, մեծ արուեստագէտ, հայ ազգի մեծ զաւակ Շառլ Ազնաւուրի յիշատակը: Հնչեց «Տէր ողորմեա» հայ հոգեւոր երգը՝ կատարմամբ մեցցօ-սոփրանօ Անայիս Հեղոյեանի:

Այնուհետեւ ելոյթով հանդէս եկաւ Լոնտոնի Թէքէեան խնամակալ մարմինի պատուաւոր քարտուղար, Լոնտոնի «Կոմիտաս» կամերային երգչախումբի նախագահ եւ Երեւանի «Թէքէեան կեդրոն» հիմնադրամի նախագահ Վարդան Ուզունեանը: Շնորհաւորելով համայն աշխարհի հայութիւնը սիրելի մայրաքաղաքի ծննդեան 2800ամեակի առթիւ՝ ան յատկանշեց հազարամեակներու պատմութիւն ունեցող քաղաքի կայուն զարգացման ուղին: Ան նաեւ կարեւորեց հայկական մշակութային արժէքներու պահպանման ու տարածման անհրաժեշտութիւնը. «Քանի դեռ մենք կը պահպանենք մեր մշակութային ժառանգութիւնը, մեր հաւատքը դէպի Հայ առաքելական եկեղեցին, սէրը հայոց լեզուի, Հայաստանի ու Արցախի հանդէպ, մեր ազգը կը շարունակէ բարգաւաճիլ, իսկ Երեւանը միշտ կ’ըլլայ մեր միասնութեան, մեր հզօրութեան գրաւականը»:

Միացեալ Թագաւորութեան մէջ Հայաստանի դեսպանութեան խորհրդական Տիգրան Գալստեանը, ջերմ շնորհաւորանքներ յղելով քաղաքամայր Երեւանի հիմնադրման յոբելենական տարեդարձին առթիւ, իր խօսքին մէջ նշեց. «Երեւանը հայ ժողովուրդի բազմադարեայ պատմութեան կենդանի վկաներէն է: Այն կենսակերպ է՝ իր պատմութեամբ, մշակութային հարուստ կեանքով, ճարտարագիտական որոյն ոճով. կրթութեան ու գիտութեան, արուեստի ու գրականութեան կեդրոն է: Մենք հպարտ ենք «Երեւան դարձած Էրեբունի»ով, ուստի պէտք է նաեւ հոգանք, որպէսզի Հայաստանի սրտին մէջ բաբախող մեր հարազատ քաղաքը տարուէ-տարի աւելի բարգաւաճի ու զարգանայ»:

Հիւրերը ողջունեց ու շնորհաւորեց նաեւ Լոնտոնի Թէքէեան մշակութային միութեան նախագահ դոկտոր Կարէն Արեւեանը, որ կոչ ըրաւ աշխարհասփիւռ հայերուն սատար կանգնելու հայրենիքին, հայրենասիրութեամբ ու նուիրուածութեամբ պահպանելու եւ շէնցնելու Երեւանը, որպէսզի սերունդներուն կարելի ըլլայ փոխանցել բարեկարգ, ապահով, մաքուր ու գեղեցիկ քաղաք:

Տօնական ձեռնարկը շարունակուեցաւ մշակութային ծրագիրով՝ հայկական երաժշտութեամբ, երգով ու պարով: Տպաւորիչ ելոյթներով հանդէս եկան երգիչներ Անայիս Հեղոյեանը, Գրիգոր Նաճարեանը, Զուարթ Կարէեանը, Ցուզել Մանուչարովան, Ֆէյրուզ Թորոսեանը, ջութակահար Անժելա Նաճարեանը, քլարնեթահար Փոլ Էվերնտենը, դաշնակահար Սան Չանկը, ինչպէս նաեւ Լոնտոնի Թէքէեան խնամակալ մարմինի «Կոմիտաս» կամերային երգչախումբը՝ խմբավար Գրիգոր Նաճարեանի գլխաւորութեամբ: Հանդիսաւոր երեկոյի ընթացքին հնչեցին հայ երաժշտահարներու՝ Կոմիտասի, Արամ Խաչատրեանի, Արմէն Տիգրանեանի, Ռոպերթ Պետրոսեանի եւ այլոց գործերէն: Համերգային մասը եզրափակուեցաւ Լոնտոնի «Ախթամար» պարային համոյթի ելոյթներով /գեղարուեստական ղեկավար՝ Արսէն Զաքարեան/:

Տօնական ճաշկերոյթի ընթացքին ցուցադրուեցաւ բեմադրիչ Արտակ Աւտալեանի՝ 2014 թուականին նկարահանած «Հռոմէն աւելի հին մայրաքաղաքը» փաստավաւերագրական ֆիլմը, որ կը ներկայացնէ Երեւան քաղաքի պատմութիւնը՝ սկսած հնագոյն ժամանակներէն՝ իր հիմնադրումէն, մինչեւ 21րդ դար:

Հանդիսաւոր ձեռնարկը աւարտեցաւ Տ. Յովակիմ եպիսկոպոսի շնորհաւորական խօսքով եւ օրհնութեամբ: Հոգեւորականը նաեւ բարձր գնահատանքի արժանացուց Լոնտոնի Թէքէեան կառոյցներու ազգանուէր գործունէութիւնը եւ մաղթեց նորանոր յաջողութիւններ ու ձեռքբերումներ հայապահպանութեան դժուարին գործին մէջ:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին