Ուրբաթ, 12 Հոկտեմբեր 2018ի երեկոյեան մշակութասէր ընտրանիի մը հաւաքավայրը դարձեալ Հայկազեան համալսարանն էր: Այս անգամ վերջին տասնամեակին չորրորդ անգամը ըլլալով, Տէրեան Հայագիտական Գրադարանը կազմակերպած էր արդէն աւանդութիւն դարձած Լիբանանահայ գրողը գնահատելու «Լիբանանահայ Գիրքը-2017»ին հանդիսութիւնը:
Հեղինակներու, պատկան մարմիններու ներկայացուցիչներու, բարեկամներու եւ ընդհանրապէս հայ գիրն ու գիրքը սիրողներու ներկայութեան, ձեռնարկը սկսաւ Լիբանանի եւՀայաստանի քայլերգերու յոտնկայս ունկնդրութեամբ:
Բարի գալուստի եւ բացման խօսքը կատարեց գրադարանապետուհի Օրդ. Սոնիա Սիսլեան: Օրուան բանախօսն էր լիբանանահայ հրապարակագիր Պրն. Ահարոն Շխրտըմեան:
Գեղարուեստական յայտագրով հանդէս եկան Հայկազեան համալսարանի ուսանողներ՝ Մինաս Ադամեան՝ «Հայոց տառեր» երգով, դաշնակի ընկերակցութեամբ Արի Վարդանեանի:
Օրդ. Սիսլեանի կողմէ հեղինակներու եւ 2017ին հրատարակած իրենց գիրքերու ներկայացումին զուգահեռ, անոնք ստացան գնահատագիրեր՝ ձեռամբ համալսարանի նախագահ Վեր. Դոկտ. Փօլ Հայտոսթեանի: 21 հեղինակներ եւ 31 աշխատութիւններ պարփակող սոյն ձեռնարկի գնահատագիր ստացողներու անունով սրտի խօսքով հանդէս եկաւ դոկտ. Մեսրոպ վրդ. Թոփալեան:
Ձեռնարկի աւարտին ներկաները հիւրասիրութեան սեղանի մը շուրջ շարունակեցին իրենց մտերմիկ զրոյցները:
