«ԶԱՐԹՕՆՔ», ՊԷՅՐՈՒԹ –Աշխարհի մէջ աւելի քան 120 մլն մարդ կը տառապի սովի եւ թերասնունդի խնդիրէն: Ափրիկէի երկրիները այս վարկանիշի մրցանշակիրներն են: Այդ մասին կը վկայեն «Սովի ընդհանուր տեղեկատու» ամէնամեայ զեկոյցի տուեալները, զորս հրապարակած է Պարենային քաղաքականութեան միջազգային հետազօտական հիմնարկը Welthungerhilfe եւ Concern Worldwide ոչ կառավարական կազմակերպութիւններու հետ համատեղ, կը փոխանցէ «Արմէնփրես»-ը:
Կը նշուի, որ 2018 թուականի ցուցանիշը առաւելագոյնին հասած է այս զեկոյցի հրապարակման ամբողջ ժամանակաշրջանին: Զեկոյցի տեղեկութեան համաձայն՝ այսօրուայ դրութեամբ սովէ կը տառապի շուրջ 124 մլն մարդ՝ երկու տարի առաջուան 80 միլիոնի համեմատութեամբ: Անոր հետ մէկտեղ կը տեղեկացուի, որ հարկադիր վերաբնակներու թիւը, որոնք սովի մատնուած են կամ անբաւարար կը սնուին, այս տարի հասած է մօտաւորապէս 70 միլիոնի:
Ափրիկէի եօթը երկիրներուն մէջ, ներառեալ Չատը, Հայիթին, Մատակասքարը, Սիեռա-Լէոնէն, Եմէնը եւ Զամպիան, այս խնդիրը աւելի լուրջ վտանգ կը ներկայացնէ: Սովահար բնակչութեան հետ կապուած ամենավտանգաւոր իրադրութիւնը գրանցուած է Կեդրոնական Ափրիկէի Հանրապետութեան մէջ: Ցուցանիշի զգալի վատթարացում արձանագրուած է Հիւսիսային Քորէայի մէջ, որ սովեալ բնակչութեան թուաքանակով 27-րդ տեղէն տեղափոխուած է 11-րդ տեղը, հաղորդած է «ՌԻԱ Նովոսթի»-ն:
