«ՆՈՐ ՕՐ», ԼՈՍ ԱՆՃԵԼԸՍ – Շաբաթ, Հոկտեմբեր 13, երեկոյեան ժամը 7։00-ին «Ֆինիսիա» ճաշարանին մէջ, տեղի պիտի ունենայ Լիբանանի Հայ Աւետարանական Շամլեան-Թաթիկեան երկրորդական վարժարանի Շրջանաւարտից Միութեան տարեկան եօթներորդ ճաշկերոյթ-պարահանդէսը։
Վարժարանի շրջանաւարտներուն, նախկին ուսուցիչներուն, բարեկամներուն եւ բարերարներուն ներկայութիւնն ու քաջալերանքը մեծապէս փափաքելի է։
Միութիւնս իր գործունէութեան եօթը տարիներուն ընթացքին, յատկանշական օժանդակութիւն առաքած է վարժարանիս։
Այս ձեռնարկին ընթացքին Շրջանաւարտից Միութիւնը ծրագրած է պատուել վարժարանի վաստակաշատ ուսուցչուհիներ Տիկ. Լուսին Մանճելիքեանը եւ Տիկ. Արտեմ Խաչատուրեանը։ Տիկ. Լուսին Մանճելիքեանը ութը տարիներ 1961-1969, պաշտօնավարած է որպէս մանկապարտէզի ուսուցչուհի եւ քսան տարիներ որպէս կիրակնօրեայի ուսուցչուհի, տածելով սէր ու գուրգուրանք իր աշակերտներուն հանդէպ։ Մեր երկրորդ մեծարեալ ուսուցչուհին՝ Տիկ. Արտեմ Խաչատուրեանը, ունի 22 տարիներու ուսուցչական վաստակ, որուն առաջին եօթը տարիներուն՝ 1971-էն 1978 ընթացքին, պաշտօնավարած է նախ որպէս ուսուցչուհի եւ ապա որպէս գործարարական գիտելիքներու բաժանմունքի վարիչ։ Գաղթելով Ամերիկայի Միացեալ Նահանգներ շարունակած է ուսուցչական ասպարէզը ԹՄՄ Արշակ Տիգրանեան վարժարանէն ներս, ցուցաբերելով ծով համբերութիւն եւ կատարեալ նուիրուածութիւն։ Ինչպէս նաեւ պիտի պատուըուին Շրջանաւարտից Միութեան նախկին վարչական անդամներէն Տիկ. Լիզա Մանոյեան՝ աշխատած 2012-2017, Տիկ. Ցոլին Պետիկեան՝ աշխատած 2014-2017 եւ Տիկ. Վիքի Շահրաշեանը՝ աշխատած 2015-2017, իրենց կատարած սիրայօժար եւ նուիրեալ աշխատանքին համար մեր միութեան գոյութեան տարիներուն ընթացքին։
Ինչպէս միշտ, սոյն ձեռնարկին հասոյթը պիտի յատկացուի վարժարանի կարօտեալ ընտանիքներու զաւակներուն ուսման կրթաթոշակի ապահովման։
Կանխաւ կը գնահատենք եւ մեր երախտագիտութիւնը կը յայտնենք մասնակցողներուն՝ իրենց ներկայութեան եւ օժանդակութեան համար։
Երեկոն պիտի խանդավառէ սիրուած երգիչ Մարտիկ Յովհաննէսեանը։
Տոմսերը ապահովելու համար հեռաձայնել հետեւեալ թիւերուն՝ (626)394-7048, (949)903-6111։
