«ԶԱՐԹՕՆՔ», «ՍԵՊՏԵՄԲԵՐԵԱՆ ԲԱՑԱՌԻԿ», ՊԷՅՐՈՒԹ – Հայաստանի Հանրապետութեան անկախութեան իւրաքանչիւր տարելիցին մենք, բնականաբար եւ անհրաժեշտաբար, անդրադառնում ենք պետականութեան խորհուրդներին:
Արդ, պէտք է արձանագրենք, որ պետականութեան առաջնային եւ անանցանելի խորհուրդն է ազգապահպանութիւնը: Որեւէ ժողովուրդ՝ զրկուած պետականութիւնից, դատապարտուած է իր միջավայրի փոքրամասնութեան, անխուսափելի ստորադասութեան եւ ուծացման:
Պետականութիւնը ժողովրդի հաւաքականութեան երաշխիքն է, իսկ հաւաքականութիւնն ազգի բարգաւաճման, առաջընթացի եւ վերելքի ամենագործուն միջոցը: Այդ իսկ պատճառով է, որ անկախ Հայաստանի Հանրապետութեան հիմնական բնորոշիչներից մէկը պէտք է դառնայ հայակենտրոնութիւնը: Հայակենտրոնութիւն ե՜ւ հայահաւաքութեան իմաստով, ե՜ւ աշխարհասփիւռ հայութեան առջեւ ծառացած խնդիրների գնահատման, ինչպէս նաեւ դրանց լուծումների որոնման իմաստով:
Հայ ժողովրդի նորագոյն շրջանի պատմութեան ամենաբախտորոշիչ եւ շրջադարձային իրադարձութիւնը 1918թ. Հայաստանի Հանրապետութեան հիմնումն էր եւ դարերով կորսուած պետականութեան վերականգնումը: 2018թ.՝ հարիւր տարի անց, մենք տօնում եւ արժեւորում ենք այդ գերարժէք ձեռքբերումը եւ հաւաստում պետականութեան պահպանման եւ ամրապնդման մեր յանձնառութիւնը:
1918թ. Մայիսը մեզ տուեց այն համոզումը, որ անկախութիւնն իրականանալի է եւ հասանելի նոյնիսկ երկար դարերի ընդմիջումից յետոյ: Այդ համոզումը մեզ կրկին առաջնորդեց 1991 թուականին: Այժմ պէտք է ներդնենք ամենայն ջանք՝ ապահովելու այդ շարունակականութիւնը եւ բացառենք ընդհատումները:
Դա մեզ համար հրամայական է՝ պահպանելու հայ ժողովրդի ուրոյն նկարագիրը եւ ինքնութիւնը, բերելու իր ներդրումը համաշխարհային ժառանգութեանը:
Այս գիտակցութիւնն է, որ պէտք է որդեգրենք, մենք ինքներս դրանով առաջնորդուենք եւ փոխանցենք յաջորդ սերունդներին:
Շնորհաւորում եմ մեզ բոլորիս Հայաստանի Հանրապետութեան անկախութեան 27-րդ տարելիցի առիթով: Թող այն լինի հայոց պետականութեան նուաճումների հերթական հանգրուանը:
Ամենայն յարգանօք՝
Սամուէլ Մկրտչեան
Լիբանանում ՀՀ դեսպան
