«ԶԱՐԹՕՆՔ», ՊԷՅՐՈՒԹ – Ազրպէյճանական լրատուամիջոցները մանրամասնութիւններ հրապարակած են 4 օր առաջ «հայկական կողմէն» սպաննուած զինծառայողին վերաբերեալ:
Այս մասին, ինչպէս կը հաղորդէ «Արմէնփրես»–ը, կը յայտնէ ազրպէյճանական meydan.tv-ն:
Լրատուամիջոցի փոխանցմամբ, «հայկական կողմէն» սպաննուած զինուորը Ազրպէյճանի զինուած ուժերու զինծառայող, Կիանճայի Քափազ շրջանի բնակիչ Իպրահիմ Ճէյհուն օղլու Ալլահվերդիեւն է (ծնեալ՝ 1999): Meydan.tv-ի փոխանցմամբ՝ այս մասին տեղեկութիւնը յայտնած է զինծառայողի մօրեղբայրը եւ նշած, որ արդէն եղած է թաղման արարողութիւնը:
Պատասխանելով լրատուամիջոցի հարցումին՝ Քափազի շրջանի տեղական ինքնակառավարման մարմինը նշած է, որ իրենք զինծառայողի մահուան վերաբերեալ տեղեկութիւններ չունին:
Ընկերային ցանցերու վրայ տեղ գտած տեղեկութիւններուն համաձայն՝ Իպրահիմ Ճէյհուն օղլու Ալլահվերդիեւէն բացի՝ կան մէկ զոհ եւ մէկ վիրաւոր եւս, որոնց մասին տակաւին լրացուցիչ տեղեկութիւններ չկան:
Ինչպէս միւս դէպքերուն, այս դէպքին վերաբերեալ նոյնպէս Ազրպէյճանի ՊՆ-ը կը լռէ:
