«ԶԱՐԹՕՆՔ», ՊԷՅՐՈՒԹ – Հայաստանի Հանրապետութեան պետական վերահսկողութեան ծառայութիւնը զօրահաւաքի կազմակերպման հետ առաջարկներ ներկայացուցած է պաշտպանութեան նախարարութեան, զորս կեանքի կոչելու պարագային, կաշառակերութեան հաւանականութիւնը աւելի կը նուազի: «Արմէնփրես» լրատուական գործակալութեան մամուլի սրահին մէջ լրագրողներու հետ հանդիպումին այս մասին յայտնեց Հայաստանի Հանրապետութեան պետական վերահսկողութեան ծառայութեան պետ Դաւիթ Սանասարեանը՝ ամփոփելով պաշտօնավարման 100 օրը:
«Իմ խորհրդականներս եղած են կեդրոնական զինուորական հաւաքակայանին մէջ, մշտադիտարկում իրականացուցած են, հետեւաբար ծնած են առաջարկներ, զորս մենք ներկայացուցած ենք պաշտպանութեան նախարարութեան: Մենք կը կարծենք, որ զօրահաւաքը այլ կերպ պէտք կազմակերպել, որուն շնորհիւ կաշառակերութեան հաւանականութիւնը աւելի կը նուազի»,- «Արմէնփրես»-ի հաղորդմամբ ընդգծեց Դաւիթ Սանասարեանը:
Ան աւելցուց, որ յառաջիկային այդ հարցով քննարկում պիտի ունենան պաշտպանութեան նախարարութեան հետ:
