ՀԲԸՄ- ՀԵԸ Անդրանիկը, իր պասքեթպոլի դպրոցին շնորհիւ, վառ կը պահէ անցեալի փայլուն աւանդութիւնները: ՀԵԸ Անդրանիկի տարիքային դպրոցի խումբերը, փորձառու մարզիչներու հսկողութեան տակ, նոր աւիւն եւ եռանդ կը հաղորդեն բարձրագոյն խումբերու ախոյեանութեան մասնակցող ՀԵԸ-ի տղոց եւ աղջկանց կազմերուն:
Շաբաթ, 25 Օգոստոս 2018-ի առաւօտեան, ՀԵԸ Անդրանիկի պասքեթպոլի 2002-2003 եւ 2004-2005 տարիքային զոյգ խումբերը, գլխաւոր մարզիչ Յարութ Գուզուճեանի գլխաւորութեամբ ՀԲԸՄ-ի Տեմիրճեան կեդրոնէն մեկնեցան Պէյրութի միջազգային օդակայանը, եօթնօրեայ շրջապտոյտ մը կատարելու Հայաստանի մէջ:
Երեւանի Զուարթնոց միջազգային օդակայանին մէջ մեր պասքեթպոլիստներուն դիմաւորեց ՀԵԸ-ի պասքեթպոլի կազմերու ընդհանուր պատասխանատու Թոնի Ճունթոյեանը: Մեր պատանիները օթոպիւսով ՀԲԸՄ-ի Կարապետեան կեդրոն առաջնորդելէ եւ տեղաւորելէ ետք, ընթրեցին եւ զբօսնեցան Երեւանի արուարձաններուն մէջ:
Յաջորդող օրերուն մեր պատանիները այցելեցին հայոց պատմութեան եւ մայրենի լեզուի դասագիրքերէն ծանօթացած վայրերը: Հարազատ աչքերով տեսան Սուրբ Էջմիածինը, Սարդարապատը, Խոր Վիհրապը, Սեւանայ Լիճը, Ծաղկաձորը, Գառնին եւ Գեղարդը, զանազան յուշարձաններ, պատմամշակութային կեդրոններ: Բարձրացան Արագածը եւ դիտեցին հայրենի բնութիւնը: Յատկանշական էր Ծիծեռնակաբերդ այցելութիւնը, ուր յանուն ՀԵԸ Անդրանիկի պասքեթպոլի դպրոցին, ծաղկեպսակ զետեղեցին Հայոց Ցեղասպանութեան նահատակներու յուշարձանին առջեւ:
Շրջապտոյտներուն կողքին մեր պասքեթպոլիստները հետեւեցան մարզումներու եւ կատարեցին բարեկամական երեք մրցումներ, արձանագրելով երկու յաղթանակ: Հայրենի մարզասէրներուն առջեւ մեր պատանիներուն ձեռք բերած փորձառութիւնը վստահաբար դրական ներազդեցութիւն պիտի ունենայ Լիբանան վերադառնալէ ետք, մրցակից խումբերու դէմ իրենց խաղամակարդակին վրայ:
Չորեքշաբթի, առաւօտեան մեր պասքեթպոլիստները այցելեցին ՀԲԸՄ-ի Երեւանի գրասենեակը: ՀԲԸՄ-ի Հայաստանի նախագահ եւ Կեդրոնական Վարչութեան անդամ՝ Վազգէն Եագուպեան եւ Հայաստանի մէջ, ՀԲԸՄ-ի արտասահմանի երիտասարդական ծրագիրներու համադրող-պատասխանատու՝ Հերմինէ Տիւզեան, հայրենիքի մէջ հաճելի կեցութիւն մաղթեցին մեր երիտասարդ մարզիկներուն եւ ծանօթացուցին ՀԲԸՄ-ի ծաւալած գործունէութեան: Ուրախ պատեհութեամբ մը, վերջերս Էւերեսթ լեռը մագլցած եւ Մարսէյէն քայլարշաւով Երեւան ժամանած ՀԵԸ-ական Արա Խաչատուրեան ներկայ գտնուելով սոյն ընդունելութեան, մեր մարզիկներուն օրինակներ փոխանցեց իր հարուստ փորձառութենէն եւ յաջորդող օրերուն ընկերակցեցաւ մեր պասքեթպոլիստներուն:
Ժամանակը սահեցաւ եւ եօթնօրեայ շրջապտոյտը հասաւ իր աւարտին: Մեր պատանիները հայրենի հողին ջերմութեամբ յագեցած վերադարձան Լիբանան:
Այս առիթով, գնահատանքի եւ երախտիքի խօսք ՀԵԸ-ի Կեդրոնական Վարչութեան, որ՝առողջ միտք, առողջ մարմինի մէջ նշանաբանով, ոչ մէկ ջանք կը խնայէ մեր պատանիներուն ջամբելու հայեցի դաստիարակութիւն, յանուն պասքեթպոլի բարի աւանդութիւններուն շարունակութեան:
ՀԵԸ-Ի ՄԱՄԼՈՅ ԵՒ ՏԵՂԵԿԱՏՈՒԱԿԱՆ ԳՐԱՍԵՆԵԱԿ
