Երեքշաբթի, 23. 04. 2024

spot_img

Արա Պապլոյեան Ընդունած Է Իրանի Խորհրդարանի Իրան-Հայաստան Բարեկամական Խումբի Անդամները

«ԶԱՐԹՕՆՔ», ՊԷՅՐՈՒԹ – ՀՀ ԱԺ նախագահ Արա Պապլոյեան Օգոստոս 31-ին ընդունած է Իրանի Իսլամական Հանրապետութեան խորհրդարանի Իրան-Հայաստան պատգամաւորական բարեկամական խումբի ղեկավար Ռամեզան Ալի Սոպհանիֆարն ու խումբի անդամները: Այս մասին, ինչպէս կը փոխանցէ «Արմէնփրես»-ը, կը տեղեկացնեն ՀՀ ԱԺ լրատուութեան եւ հանրային կապերու վարչութենէն:

Ողջունելով հիւրերը՝ Արա Պապլոյեան վստահութիւն յայտնած է, որ այցը կը նպաստէ հայ-իրանական յարաբերութիւններու եւ յատկապէս միջխորհրդարանական համագործակցութեան հետագայ զարգացման: ՀՀ խորհրդարանի ղեկավարը ընդգծած է, որ Իրանի հետ ձեւաւորուած են սերտ, բարեկամական եւ փոխվստահութեան ամուր հիմքերու վրայ խարսխուած յարաբերութիւններ: ՀՀ ԱԺ նախագահի համոզմամբ՝ միջխորհրդարանական համագործակցութեան խորացման հարցին մէջ ուրոյն դեր ունին պատգամաւորական բարեկամութեան խմբերը. երկկողմ շփումներն ու փոխայցելութիւնները նոր լիցք կը հաղորդեն ոչ միայն միջխորհրդարանական կապերուն, այլեւ միջպետական յարաբերութիւններուն: Այս թեմայի լոյսին տակ Արա Պապլոյեանը կարեւորած է Հայաստան-Իրան բարեկամական խումբի՝ 2018-ի Փետրուարին Իրան կատարած այցի արդիւնքներն ու ձեռք բերուած պայմանաւորուածութիւնները:

Անդրադարձ կատարուած է տնտեսական երկկողմ յարաբերութիւններու զարգացման: Նշուած է, որ այս հարցին մէջ նպատակային գործունէութիւն կը ծաւալէ հայ-իրանական միջկառավարական համատեղ յանձնաժողովը: ՀՀ խորհրդարանի ղեկավարը ընդգծած է, որ Հայաստանը կրնայ կամուրջ հանդիսանալ Իրան-ԵԱՏՄ-Եւրոպա առեւտրատնտեսական յարաբերութիւններու համար:

Իրան-Հայաստան պատգամաւորական բարեկամական խումբի ղեկավար Ռամեզան Ալի Սոպհանիֆարը, շնորհակալութիւն յայտնելով ընդունելութեան համար, ՀՀ ԱԺ նախագահին փոխանցած է Իրանի խորհրդարանի նախագահ Ալի Լարիճանիի ջերմ ողջոյններն ու բարեմաղթանքները: Նշելով, որ հայ-իրանական բազմադարեան բարեկամութիւնը հիմնուած է պատմամշակութային ընդհանրութիւններու վրայ՝ խումբի ղեկավարը գոհունակութեամբ փաստած է, որ երկու երկիրները տարբեր ժամանակներու օրհասական պահերուն մշտապէս աջակցած են իրար:

Ռամեզան Ալի Սոպհանիֆարը եւս միջպետական յարաբերութիւններու զարգացման ծիրէն ներս առանձնակի կարեւորած է խորհրդարանական դիւանագիտութեան դերն ու նշանակութիւնը:

Հանդիպումի ընթացքին քննարկուած են մշակութային յարաբերութիւններու զարգացման միտումներուն, գիւղատնտեսութեան, ուժաբանութեան եւ շարք մը այլ ոլորտներու մէջ համագործակցութեան ընդլայնման վերաբերող հարցեր: Կողմերը անդրադարձած են նաեւ Մեղրիի ազատ տնտեսական գօտիի ընձեռած հնարաւորութիւնները արդիւնաւէտօրէն օգտագործելու, ինչպէս նաեւ ներդրումային տարբեր ծրագիրներու իրականացման կարեւորութեան: 

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին