Ուրբաթ, 14. 06. 2024

spot_img

Նիկոլ Փաշինեանի Մօտ Քննարկուած Են Ճանապարհաշինութեան Ոլորտի Հարցեր

«ԶԱՐԹՕՆՔ», ՊԷՅՐՈՒԹ – ՀՀ վարչապետ Նիկոլ Փաշինեանի գլխաւորութեամբ կառավարութեան մէջ երէկ տեղի ունեցած խորհրդակցութեան ընթացքին քննարկուած են ճանապարհաշինութեան եւ ճամբաներու վերանորոգման ոլորտին մէջ ընթացիկ ու հեռանկարային ծրագիրները: Այս մասին, ինչպէս կը փոխանցէ «Արմէնփրես»-ը, կը տեղեկացնեն ՀՀ կառավարութեան տեղեկատուութեան եւ հասարակայնութեան հետ կապերու վարչութենէն:

Վարչապետը նշած է, որ պետութիւնը պատասխանատու է ենթակառուցուածքներու որակի եւ բնականոն աշխատանքի համար. «Այսօր, ցաւօք, ենթակառուցուածքներու որակին մակարդակով չենք գտնուիր մեր նպատակադրած հարթակին վրայ, բայց նաեւ կը հասկնանք, որ պէտք է հնարաւորինս արագ եւ արդիւնաւէտ ջանքեր գործադրենք՝ այդ նպատակակէտին հասնելու համար: Մեզի համար շատ կարեւոր է, որ ճանապարհաշինական ընթացիկ ծրագիրները որակական լուրջ փոփոխութիւն ունենան՝ նախկինին համեմատ»:

Փոխադրամիջոցներու, կապի եւ տեղեկատուական արհեստագիտութիւններու նախարար Աշոտ Յակոբեանը կառավարութեան ղեկավարին զեկուցած է 2018-ի ՀՀ պետական պիւտճէով միջպետական, հանրապետական եւ մարզային նշանակութեան ճանապարհներու հիմանորոգման աշխատանքներուն մասին: Իր խօսքով՝ ոլորտի այս տարուան պիւտճէն 6.4 միլիառ դրամ է, որով նախատեսուած էր կառուցել 66 քմ ճամբայ, բայց խնայողութեան շնորհիւ մինչեւ տարեվերջ պիտի կառուցուի 77 քմ ճամբայ՝ 11 քմ-ով աւելի:

Ա. Յակոբեանի խօսքով՝ պետական պիւճէով յառաջացած խնայողութիւններու հաշուոյն կը նախատեսուի մինչեւ տարեվերջ իրականացնել հիմնանորոգման լրացուցիչ աշխատանքներ, ինչպէս նաեւ սկսիլ յաջորդ տարուան շինարարական աշխատանքներու նախագիծերու կազմումի գործընթացը: Զեկուցուած է նաեւ միջհամայնքային նշանակութեան եւ Համաշխարհային դրամատան «Կենսական նշանակութեան ճանապարհացանցի բարելաւման ծրագիրի լրացուցիչ ֆինանսաւորում» վարկային ծրագիրի ծիրին մէջ վերականգնուող ուղիներու շինարարական աշխատանքներուն վերաբերեալ:

Վարչապետը, կարեւորելով խնայուած պաշարներու հաշուոյն մինչեւ 2018-ի աւարտը նախատեսուածէն աւելի շատ ճանապարհահատուածներու նորոգումը, յանձնարարած է շահագրգիռ գերատեսչութիւններու ղեկավարներու անգամ մը եւս ուսումնասիրել այդ շրջանակի ընդլայնման հնարաւորութիւնները եւ լրացուցիչ միջոցները ուղղել այնտեղ, ուր կան ճանապարհաշինական պատրաստ նախագիծեր:

Խորհրդակցութեան քննարկուած են Հանրապետութեան ճանապարհային ցանցի պահպանման, սպասարկման համակարգերուն, որակական եւ գիտարուեստական չափանիշներու պարզաբանման, մրցոյթներու պայմաններուն, գնումներու գործընթացին առնչուող շարք մը հարցեր:

Ոլորտին մէջ վերահսկողութեան արդիւնաւէտութեան բարձրացման լոյսին ներքոյ վարչապետ Փաշինեան կարեւորած է որակական ու գիտարուեստական յստակ բնութագիրերու սահմանումը եւ յանձնարարած է պատասխանատուներուն համատեղ քննարկել ու ներկայացնել ընդհանուր լուծումներ:

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին