Շաբաթ, 13. 04. 2024

spot_img

Մերքել Պէտք Է Սաստէ Ազրպէյճանը Մարդու Իրաւունքներու Ոտնահարման Եւ Կաշառակերութեան Համար. «Թրանսփարենսի Ինթերնեշնլ» Միջազգային Կազմակերպութեան Կոչը

«ԶԱՐԹՕՆՔ», ՊԷՅՐՈՒԹ – Օգոստոս 25-ին Ազրպէյճան կատարելիք այցի ընթացքին Գերմանիոյ Դաշնային Հանրապետութեան վարչապետ Անկելա Մերքել պէտք է սաստէ այդ երկրի կառավարութիւնը մարդու իրաւունքներու ոտնահարման, կաշառակերութեան եւ աքթիվիստներու նկատմամբ դրսեւորուած վերաբերմունքի համար: Ինչպէս կը հաղորդէ «Արմէնփրես»-ը, նման յայտարարութիւն կատարած է «Թրանսփարենսի Ինթերնեշնլ» միջազգային կազմակերպութեան քարտուղարութիւնը:

«Ըստ լրատուամիջոցներու նիւթերուն` Մերքելի` հարաւկովկասեան երկիրներ այցի օրակարգի մեխը Գերմանիոյ կողմէ Հարաւային կազային միջանցքին ցուցաբերուող աջակցութիւնն է: Կը նշուի, որ ծրագիրին €1.2 միլիառ վարկ տրամադրող շնորհատուն Գերմանիան է:

«Ազրպէյճանն ու Գերմանիան ակնյայտօրէն յաջող գործարք կը կնքեն Շաբաթ օրը վարչապետ Մերքելի՝ Ազրպէյճան այցելութեան ընթացքին: Սակայն որպէս ԵՄ ամենաազդեցիկ անդամ երկրի ղեկավար՝ վարչապետ Մերքել պէտք է ապահովէ, որ իր գործողութիւնները խթանեն եւ ներկայացնեն եւրոպական արժէքներ ու բերեն տեւական արդիւնքի քաղաքական բանտարկեալներու ազատման գործին մէջ, դիւրացնեն քաղաքացիական հասարակութեան կազմակերպութիւններու ֆինանսաւորման նկատմամբ սահմանափակումները»,- նշած է «Թրանսփարենսի Ինթերնեշնլ»-ի իրաւախորհրդատու Ատամ Ֆոլտեսը: Ազրպէյճանի մէջ «Թրանսփարենսի Ինթերնեշնլ»-ի ներկայացուցչութիւնը զգալիօրէն սահմանափակած է իր գործունէութիւնը արտասահմանեան ֆինասաւորման պետական գրանցումի հետ կապուած խնդիրներու պատճառով:

«Անցեալ ամիս Եւրախորհրդարանի պատգամաւորները կոչ ըրած են, որ Ազրպէյճանի հետ յարաբերութիւններու հաստատումը այսուհետեւ հիմնուի ժողովրդավարութեան, օրէնքի գերակայութեան եւ մարդու իրաւունքներու աջակցութեան վրայ: Գերմանիան այդ երկրին հետ իր յարաբերութիւնները պէտք է նոյն սկզբունքով կառուցէ»,- շարունակած է Ֆոլտեսը:

Յուլիսին Եւրախորհրդարանի պատգամաւորները առաջարկած են, որ ԵՄ-ը «որոշ դրոյթներ կիրարկէ` օգնելու տնտեսական յանցագործութիւններու, այդ կարգին` կաշառակերութեան, փողերու լուացման եւ հարկերէ խուսափելու դէմ Ազրպէյճանի մղած պայքարին եւ սատարէ փողերու լուացման համակարգերուն դէմ հետաքննութիւններու իրականացման, մասնաւորապէս «Լուացքատան» գործին մէջ:

«Ազրպէյճանական լուացքատունը» կը վերաբերի ազդեցիկ անձեր կաշառելու համար նախատեսուած ազրպէյճանական 2.9 միլիառ ԱՄՆ տոլարնոց հիմնադրամին, որ ենթադրաբար հովանաւորուած է Ազրպէյճանի կառավարութեան կողմէ: Վերջինս օգտագործած է առերեւոյթ ընկերութիւնները փողերու լուացման եւ եւրոպացի քաղաքական գործիչները կաշառելու համար, որպէսզի լռեցնէ մարդու իրաւունքներու վերաբերեալ անկախ զեկոյցները, ֆինանսաւորէ ընտրութիւններու կեղծ դիտորդական առաքելութիւնները եւ մաքրէ Ազրպէյճանի համբաւը:

Ազրպէյճանի կառավարութեան հետ որեւէ գործարք կնքելու նպատակով բանակցելու ժամանակ Գերմանիոյ կառավարութիւնը պէտք է պահանջէ ազատութիւն քաղաքական բանտարկեալներուն, ազատ եւ բազմակարծութիւն դաւանող լրատուական դաշտ, աքթիվիստներու` պայքարի եւ որոշումներու կայացման մասնակցելու տարածք եւ կաշառակերութեան դէմ պայքարի գործնական միջոցներ»,- ըսուած է յայտարարութեան մէջ:   

spot_img

ՆՄԱՆ ՆԻՒԹԵՐ

spot_img
spot_img

ՎԵՐՋԻՆ ՅԱՒԵԼՈՒՄՆԵՐ

spot_img

Զօրակցիր Զարթօնք Օրաթերթին